РК АЛКАЛОИД – ГРК ТИКВЕШ 35-26 (21-9)

Сала: „Автокоманда“ во Скопје. Судии: Сашо Кркачев и Ѓоко Колевски. Делегат: Ацо Николовски
РК АЛКАЛОИД: Кизиќ, Галевски 1, Трајкоски, Петров 1, Маркоски 2, Младеновиќ, Серафимов 8, Стојковиќ 1, Митев 1, Ѓоргиев 1, Велковски 3, Бинго 5, Франциско 3, Петковски 9, Савревски, Панчевски
Седмерци: 6/7 Исклучувања: 10 мин.

ГРК ТИКВЕШ: Арсиќ, Анастасовски 3, Темелкоски, Велков, Соколов, Андоновски 4, Кофилоски, ДИмовски 3, Лазов, Манасков 2, Гачевиќ 1, Коцев 3, Летиќ 2, Кривокапиќ 6, Даневски, Обина 2
Седмерци: 5/7 Исклучувања: 6 мин.

РК Алкалоид со убедлива победа на дерби мечот над ГРК Тиквеш и со освоено прво место на табелата се одјави од клупската сцена за 2024 година. Во последното коло од календарската година, РК Алкалоид на домашен терен го пречека кавадаречкиот состав и славеше победа од девет гола разлика.
Натпреварот беше решен во првиот дел во кој РК Алкалоид комплетно доминираше на теренот од почетокот и поведе со 10-5, 12-6, а на полувреме имаше големи 11 гола разлика (21-9).
Во второто полувреме, темпото беше малку посмирено, па и резултатски беше по израмнето. РК Алкалоид водеше со разлика од девет до 10 гола сѐ до финишот кога во еден момент гостите намалија на минус шест (23-29). Веднаш следеше одговор и конечниот резултат е плус девет за сино-белиот состав.

Александар Петковски со девет постигнати гола и Мартин Серафимов со осум погодоци беа најефикасните ракометари на РК Алкалоид.
Со овој натпревар РК Алкалоид ја заврши есенската фаза од Суперлигата го освои првото место на табелата и сега вниманието ќе биде свртено кон настапот на сениорската репрезентација на Светското првенство во Хрватска, Данска и Норвешка во јануари.
Следниот првенствен натпревар ќе го играме против екипата на Струга, во февруари следната година.

РК ПРИЛЕП – РК АЛКАЛОИД 30-40 (13-18)
Сала: „Ристе Ристевски Ричко“ во Прилеп. Судии: Сашко Кркачев и Ѓоко Колевски. Делегат: Васил Чавдаров
РК ПРИЛЕП: Ангелески, Тренчевски 6, Кастратовиќ 2, Рајатовски 2, Адамчески 3, Бикоски, Ивчески, Илиески 5, Органџиев 2, Бурчески, Цветаноски 7, Христоски, Левани, Квастек 3, Трајкоски, Трајчевски
Седмерци: 4/5 Исклучувања: 10 мин.
РК АЛКАЛОИД: Кизиќ, Трајкоски, Џонов 4, Петров 1, Маркоски 1, Младеновиќ 2, Серафимов 2, Стојковиќ 3, Митев 1, Ѓоргиев 5, Велковски 2, Бинго 3, Франциско 3, Петковски 9, Савревски 4
Седмерци: 1/2 Исклучувања: 8 мин.

РК Алкалоид ја запиша 14 првенствена победа во Суперлигата и ќе го одбрани првото место на табелата и по актуелното претпоследно коло во 2024 година.
РК Алкалоид вечерва гостуваше кај екипата на РК Прилеп и запиша убедлива победа од 10 гола разлика, на ефикасен натпревар на кој беа постигнати вкупно 70 погодоци.

Фаворитската улога беше доделена на РК Алкалоид пред натпреварот, а Кирил Лазаров и неговите избрани ракометари целосно ја оправдаа и го контролираа натпреварот уште од почетокот.
РК Алкалоид поведе со 7-4 во првата фаза од натпреварот и потоа разликата од три до четири гола предност ја одржуваше во текот на целото прво полувреме. Во финишот на полувремето уште еднаш РК Алкалоид засили, поведе со 16-10, а на полувреме замина со пет гола предност (18-13).
Во второто полувреме немаше големи резултатски осцилации. РК Алкалоид имаше комплетна контрола, водеше со шест до осум гола разлика, за конечно средбата да ја заврши со победа од 10 гола разлика (40-30).
Александар Петковски, одигра уште еден одличен натпревар и постигна девет гола, следен од Игор Ѓоргиев кој постигна пет.

Во следното, последно коло во 2024, РК Алкалоид на домашен терен го пречекува тимот на ГРК Тиквеш од Кавадарци. Тој меч ќе се игра на 18 декември во Автокоманда со почеток од 17:00 часот.

РК АЛКАЛОИД – РК БУТЕЛ СКОПЈЕ  32-24 (16-15)
Сала: „Автокоманда“ во Скопје. Судии: Ненад Николовски и Исмаил Металари. Контролор: Душко Камишевски
РК АЛКАЛОИД: Галевски 3, Трајкоски, Петров, Маркоски, Младеновиж 2, Серафимов 6, Карасманакис, Стојковиќ 1, Митев 4, Ѓоргиев 1, Велковски 2, Симоноски 3, Бинго 4, Франциско, Петковски 5, Савревски 1
Седмерци: 5/7 Исклучувања: 10 мин. 
РК БУТЕЛ СКОПЈЕ: Блажевски, Субашевски, Тодески 1, Ѓеоргиевски 6, Николов 9, Стојаноски, Спасовски 1, Т. Узунчев 3, Киселовски, Бошковски, Николовски, Михајловиќ, Цветковски, Шопиќ 4, Давитковски 
Седмерци: 3/8 Исклучувања: 14 мин. 

РК Алкалоид ја продолжи победничката низа на секогаш тешките и „непријатни“ дуели со РК Бутел Скопје и ја забележа 13 суперлигашка победа сезонава од 14 одиграни натпревари или вкупно 18 победа од 17 одиграни официјални натпревари од почетокот на сезоната.

Гостинскиот состав се прикажа во борбено издание, беше резултатски рамноправен противник особено во првото полувреме, во кое имаше и водство во раната фаза од натпреварот, но нашиот тим беше спремен да одговори на предизвикот и уште во првото полувреме го презема водството и на одмор замина со еден гол предност.

Во второто полувреме беше многу појасно изразена доминацијата на РК Алкалоид кој на моменти имаше и девет гола предност за конечно натпреварот да заврши со резултат 32-24.

РК Алкалоид се врати на првото место на табелата со оваа победа, а до крајот на 2024 има уште два дуела, на гостински терен со РК Прилеп и на домашен со екипата на ГРК Тиквеш.

РК Алкалоид по четирите победи остварени во елиминациските двобој натпревари над екипите на Клаипеда Драгунас во второто и над Вест Виена во третото коло од ЕХФ Европскиот Куп се избори за право за настап во Топ 16 на ова европско натпреварување.
Во ждрепката за 1/8 финалето, РК Алкалоид за противник ја доби екипата на ССВ Бриксен од Италија и во дуелите што е предвидено да се играат во февруари ќе се бори за пласман во 1/4 финалето на ЕХФ Европскиот Куп.

Нашиот следен противник е екипа која има повеќе од 50 години традиција и во своите позначајни резултати има запишано две шампионски титули во италијанската ракометна „Серија А“ и трипати била освојувач на Куп на Италија. Во европски рамки има настапувано 11 пати вклучително со тековната сезона, а нивниот најголем успех е пласманот во полуфиналето на Челинџ Куп во сезоната 2000/2001.
Минатата сезона стигна до 1/16 финалето на ЕХФ Куп каде што беа елиминирани од финалистот Олимпијакос на два дуела одиграни во Атина.

Во екипата имаат тројца странци и тројца ракометари кои имаат двојно државјанство. Тоа се украинскиот голман Максим Волјувак, Аргентинецот Томас Валентин Канете и бразилскиот бек Пауло Винисиус де Оливеира Кандидо. Пикерот Андреа Башиќ има и хрватско државјанство, а двоецот Ендрит и Ардијан Ибаљи имаат и косовско државјанство.
Тренер на екипата е Рудолф Нојнер кој сезонава го презема кормилото од српскиот тренер Давор Чутура.
На поширок список на сениорската репрезентација има има двајца ракометари на Бриксен, а тоа се левото крило Стефано Арциери и пикерот Ендрит Ибаљи. Селекторот на јуниорите, пак, во тимот го има голманот Алесандро Лубинети.

Сезонава, ССВ Бриксен во второто коло го елиминираше тимот на Х-71 од Фарски острови, а во третото коло приреди изненадување со елиминација на подобро рангираната чешка екипа Ловосице на два натпревари што се играа во Чешка.
Термините за одигрување на 1/8 финалните натпревари се 15/16 февруари и 22/23 февруари. Алкалоид на првиот натпревар ќе биде гостин.

ВЕСТ ВИЕНА – РК АЛКАЛОИД 29-32 (12-16)
Сала: „Автокоманда“ во Скопје. Судии: Филип Фанер и Лукас Кубиш од Полска. Делегат: Борис Ивановиќ од Србија
ВЕСТ ВИЕНА: Вејк 1, Единове, Мелезинг 4, Мостл 3, Дердак 3, Г. Кофлер 1, Драгер 2, Беркоп 2, Хубер 2, Фристик, Фајфер 2, Бруславски 4, Гарејс 4, Пајер, Вигфри, Ј. Кофлер
Седмерци: 1/2 Исклучувања: 6 мин.
РК АЛКАЛОИД: Галевски (5 одб), Кизиќ (7 одб), Џонов 3, Маркоски, Младеновиќ, Серафимов 7, Карасманакис, Стојковиќ 1, Митев 3, Ѓоргиев 1, Велковски 1, Бинго 2, Франциско 2, Симоноски 3, Петковски 7, Савревски 2
Седмерци: 4/5 Исклучувања: мин. 4 мин,

РК Алкалоид се пласираше во 1/8 финалето на Европскиот ЕХФ Куп и со тоа испиша уште една успешна страница во клупската историја.

По триумфот од 38-27 на првиот натпревар со австрискиот тим Вест Виена, вечерва Алкалоид на реванш натпреварот што исто така се играше во Автокоманда, но официјално домаќини беа Австријците го потврди пласманот во следното коло, каде што ќе бидат 16 најдобри екипи во ова натпреварување.
РК Алкалоид противникот за следното коло кое пак ќе се игра во февруари, ќе го дознае во вторник.

Темпото на вечерашниот натпревар не беше брзо како на првиот меч, но РК Алкалоид подобро се снаоѓаше од противникот и со побавен стил на игра.

Резултатот го диктираше нашиот состав, водевме со гол до два разлика во првите дваесетина минути, а потоа со серија од 5-0, РК Алкалоид поведе и со седум гола разлика (15-8). На полувреме, резултатот беше 16-12, откако и Австрискиот состав ги искористи своите „пет“ минути.
Размената на голови на почетокот на вториот дел го стави во преден план Александар Петковски, а разликата остана меѓу три и четири гола (21-17, 37 мин), а плус пет гола разлика беа одново достигнати во 40 минута (23-18).

На осум минути до крајот на натпреварот, Алкалоид водеше 30-25 и без поголеми проблеми го приведе мечот кон крајот и се промовираше во 1/8 финалист на ЕХФ Европскиот Куп.

РК АЛКАЛОИД – ВЕСТ ВИЕНА 38-27 (20-14)
Сала: „Автокоманда“ во Скопје. Судии: Филип Фанер и Лукас Кубиш од Полска. Делегат: Борис Ивановиќ од Србија

РК АЛКАЛОИД: Галевски (10 одб), Трајкоски (6 одб), Џонов 2, Петров, Маркоски, Младеновиќ, Серафимов 8, Карасманакис, Стојковиќ 2, Митев 7, Ѓоргиев, Велковски 2, Бинго 6, Франциско 2, Петковски 9, Савревски
Седмерци: 4/6 Исклучувања: 10 мин.
ВЕСТ ВИЕНА: Вејк, Единове, Мелезинг 8, Мостл 2, Дердак, Г. Кофлер 3, Драгер 4, Беркоп 2, Хубер 1, Фристик 1, Фајфер, Бруславски 4, Гарејс, Пајер, Вигфри, Ј. Кофлер 1

Седмерци: 5/7 Исклучувања: 8 мин.

РК Алкалоид направи голем чекор кон 1/8 финалето на ЕХФ Европскиот Куп по денешната победа над австрискиот претставник Вест Виена.

Уште еднаш РК Алкалоид имаше шанса да игра против екипа која игра брзо и не го менува ритамот без разлика на моменталниот резултат.

Поведоа со 2-0 гостите, но веднаш следше одговор од нашиот тим кој по десет минути игра во кои издоминира Арно Бинго со пет постигнати голови веќе водеше со 8-4.
Пет минути подоцна беше 12-6 по што резултатски натпреварот се смири и разликата до крајот на полувремето се движеше меѓу шест и седум гола разлика за РК Алкалоид.

Добри моменти во овој дел имаше голманот Иван Галевски, а се истакна и десното крило Александар Петковски кој беше стрелец на пет гола во првите 30 минути.
По девет минути игра во второто полувреме РК Алкалоид за прв пат поведе со 10 гола разлика (26-16).

Динамичната игра донесе голови на двете страни, а за одбележување е и настапот на голманот Благојче Трајкоски кој за кратко време успеа за запише шест одбрани. Конечно, РК Алкалоид победи со 11 гола разлика (38-27) и помирно ќе го чека вториот натпревар.

Реванш натпреварот ќе се игра утре, во „Автокоманда“ со почеток од 19:00 часот.