Почитувани медиуми, отворен е процесот за акредитирање на медиумите и медиумските работници за финалето на ЕХФ Европскиот Куп меѓу екипите на РК Алкалоид и АЕК Атина што ќе се игра на 25 мај (недела) од 20:30 часот во СЦ „Борис Трајковски“ – Скопје.

Новинарите од печатените медиуми, порталите и фотографите треба да ги испратат своите барања најдоцна до 22.5. Барањата за акредитации треба да ги испратат на следнава адреса: marketing@rkalkaloid.mk

Тeлевизиите, Веб телевизиите, подкаст, радио/вебрадио мораат да аплицираат директно во EHF за добивање на акредитација за следење на натпреварот. Барањата за акредитации треба се реализираат преку онјалн платформата за акредитирање на EHF: https://accreditation.ehf.eu

АЕК – РК АЛКАЛОИД 25-29 (14-16)
Сунел Арена во Атина. Судии: Гитис Снуревичиус и Андруш Григалионис од Литванија. Делегати: Олав Оле Свеин од Норвешка и Франциско Баласкез од Шпанија

АЕК: Женти, Тепер, Арампацис, Матиќ 1, Властос, Шмит 4, Кеита 1, Панајоту 4, Лулиќ 1, Кукулас, Дејвис, Гара 6, Туре 5, Бургар, Шукилович, Сако 3

Седмерци: 1/6 Исклучувања: 4 мин.

РК АЛКАЛОИД: Кизиќ (9 одб), Галевски (5 сед, 2 одб), Џонов, Маркоски 1, Младеновиќ 1, Серафимов 6, Карасманакис, Стојковиќ 3, Велковски 2, Симоноски, Ивановски 3, Бинго 3, Франциско 5, Петковски 3, Митев 2, Савревски

Седмерци: 4/4 Исклучувања: 10 мин.

РК Алкалоид извојува победа од четири гола разлика (29-25) над екипата на АЕК од Грција во првиот меч од финалниот двобој во ЕХФ Европскиот Куп што се одигра во Атина.

Во тензична атмосфера во полната сала во Атина, во натпревар кој двапати беше прекинуван поради дивеењето на домашните навивачи кои фрлаа разни предмети на теренот, ракометарите на РК Алкалоид одиграа на висина на задачата, пружија бескомпромисна борба, ги издржаа сите притисоци и конечно, стигнаа до посакуваниот резултат.

Во првите петнаесет минути од натпреварот се играше израмнето со тоа што и двата тима повремено беа во водство. РК Алкалоид подобро функционираше на теренот. Одбраната ја вршеше одлично својата работа, а колективот уште еднаш го изнесе товарот. Сино белиот тим, подобро се снајде во финишот на првото полувреме и успеа да ја добие таа делница со резултат 16-14.

Посилен ритам натпреварот имаше во второто полувреме. РК Алкалоид диктираше водство, а домашниот состав се обидуваше со сите сили да израмни. Икс фактор на натпреварот беше голманот Иван Галевски кој успеа да одбрани дури пет седмерци на домашниот тим.

Кон средината на полувреме натпреварот двапати беше прекинуван поради домашните фанови, но ракометарите на РК Алкалоид го издржаа притисокот, играа одлична одбрана и успеаја да го скршат отпорот на домашниот состав и да стигнат до посакуван резултат.

Реванш натпреварот ќе се игра следната недела во „Борис Трајковски“ во Скопје.

РК АЛКАЛОИД – РК ВАРДАР 1961 26-26 (12-12)

Сала:„ Автокоманда“ во Скопје. Судии: Михајло Илиевски и Методија Илиевски од Битола. Делегати: Драган Начевски и Ацо Николовски
РК АЛКАЛОИД: Кизиќ (8 +1 сед) , Галевски (2 одб+ 1 сед), Џонов 1, Маркоски 2, Младеновиќ, Серафимов 8, Карасманакис, Стојковиќ 1, Велковски, Симоноски 1, Ивановски 6, Бинго, Франциско 3, Петковски 3, Митев 1, Савревски

Седмерци: 4/5 Исклучувања: 8

РК ВАРДАР 1961: Еспиња (11 одб), Гогов, М. Стојановски, Јагуриновски 2, Аларов, Т. Стојановски, Георгиевски 2, Танкоски 2, Коиј 1, Лазаревски 6 Хориха 3, Срдановиќ 2, Николиќ 1, Петриќ, Пинто, Борозан 7
Седмерци: 0/2 Исклучувања: 8 мин.

Големото дерби во македонската суперлига меѓу екипите на РК Алкалоид и РК Вардар 1961 заврши со поделба на бодовите, откако по голема 60 минутна битка натпреварот заврши со резултат 26-26.

РК Алкалоид подобро го отвори натпреварот, играше добра одбрана надополнета со инспирираниот голман Марко Кизиќ на голот и поведе со 5-2, а имаше и напад за плус четири. Но, неколку грешки во нападот го вратија во игра противничкиот состав и РК Вардар успеа да израмни на 5-5, по што натпреварот премина во игра гол за гол во која РК Алкалоид го диктираше резултатот.

Вардар го имаше единственото водство во 21 минута (8-7), но веднаш беше најден против одговор и РК Алкалоид имаше одново плус два (10-8).

Резултатот не беше прекршен, гостинските ракометари успеаја да израмнат на 10-10, а потоа до крајот на полувремето немаше поголеми промени и на полувреме се замина со резултат 12-12.

Подобро отворање на вториот дел имаше гостинскиот состав кој успеа да поведе со два до три гола разлика (17-14), но РК Алкалоид покажа карактер и успеа во најтешките моменти да најде решенија и инспирација и се врати во натпреварот.

Мартин Серафимов играше одлично во вториот дел и успеа да ја врати средбата во егал (20-20), по што иницијативата ја презема РК Алкалоид.

Голманот Иван Галевски имаше многу важни интервенции во финишот на натпреварот, но за жал РК Алкалоиид пропушти неколку напади во кои можеше да поведе и со два гола разлика и да ја олесни работата во финишот.

Се играше гол за гол, а последниот погодок три секунди до крајот го постигнаа гостите за средбата да заврши без победник.

РК Алкалоид е во финалето на ЕХФ Европскиот Куп и во својата втора европска сезона ќе се бори за победнчки пехар.

На двомечот со норвешкиот претставник Рунар Сандефјорд, РК Алкалоид демонстрираше истрајност, борбеност, трпеливот, а одговорноста ја презема колективот кој функционираше на ниво потребно за плсман во финале.

Тренерот Кирил Лазаров е задоволен од посигнатото и внимателен пред претстојните уште поголеми предизвици.

„Горд сум на тимот за тоа како ги одигра овие два натпревари со сериозно квалитетен противник. Во отсуство на нашите носители на играта покажавме дека колективот, доколку дејствува тимски може да покрие многу недостатоци и да направи успех.
Со оглед на ситуацијата, нѐ очекува пеколна завршница на сезоната. Ќе внимаваме на сѐ за на важните натпревари бидеме на потребното ниво.
Пласманот во финалето на Алкалоид е голем успех за клубот, но и за целиот македонски ракомет. Очекуваме поддршка во финалето од љубителите на ракометот во Македонија, ќе ни биде многу потребна“, изјави Лазаров.

Во финалето на ЕХФ Европскиот Куп, РК Алкалоид ќе игра со грчкиот претставник АЕК Атина. Првата средба ќе се игра на 17/18 мај, реваншот е на 24/25 мај. Кој ќе ја има предноста реваншот да го игра на домашен терен ќе биде одредено со ждрепка.

РК РУНАР САНДЕФЈОРД- РК АЛКАЛОИД 34-29 (19-15) Пенали: 1-3

Сала: „Рунархолен“ во Сандефјорд, Норвешка. Судии: Франческо Симоне и Пјетро Монотиљо од Италија. Делегат: Хеинур Леифстад од Исланд
РК РУНАР: Бјронстад, Тригестад, Окерн, Гурих 8, Грам, Рамбо 6, Хоген 1, Боје, Линдел 3, Бергли 2, Ривешјо 1, Миклебаст 2, Сјурсен 1, Кнутсен 2, Венемир 1, Вулвик 7
Седмерци: 2/2 Исклучувања: 6 мин.

РК АЛКАЛОИД: Кизиќ, Галевски, Џонов 3, Маркоски, Младеновиќ, Серафимов 7, Карасманакис 1, Стојковиќ 1, Велковски 4, Симоноски, Ивановски 4, Бинго, Франциско 1, Петковски, Митев 8, Савревски
Седмерци: 6/7 Исклучувања: 8 мин.

Седмерци:
1-0 Серафимов
1-1 Ривешјо
1-2 Митев
1-3 Петковски

РК Алкалоид е во финалето на ЕХФ Европскиот Куп! Нашиот тим ја одбрани разликата од првиот меч во Скопје и по подобро изведување на седмерци го елиминираше норвешкиот претставник Рунард Сандефјор.

Конечниот резултат од регуларниот дел е 34-29, а по изведување на пенали, РК Алкалоид славеше со 3-1 и во големото финале, за победничкиот пехар ќе игра со екипата на АЕК од Грција.

Финалните натпревари ќе се играат на 17/18 мај и 24/25 мај.

Норвешкиот состав подобро го отвори натпреварот и поведе со 6-1 што беше вовед во 50 минутна жестока битка во која се наттрчуваа играчите и се надмудруваа клупите. Норвешкиот тим имаше контрола, но РК Алкалоид покажа карактер, се бореше трпеливо и успеа во првото полувреме да намали на 13-16, а на полувреме беше 19-15.

Во вториот дел РК Алкалоид се доближи и на два гола разлика, иако некомплетен успеваше да се спротивстави, но домашниот состав во финишот на натпреварот успеа да влезе во серија што го одведе до конечните 34-29.

По ова, победникот на двомечот се решаваше со изведување на седмерци, а РК Алкалоид беше поуспешен и се пласираше во големото финале.

РК АЛКАЛОИД – РК БУТЕЛ СКОПЈЕ 33-30 (16-13)
Сала: „Автокоманда“ во Скопје. Судии: Исмаил Металари и Ненад Николовски. Делегат: Љупчо Јаневски
РК АЛКАЛОИД: Кизиќ, Џонов 4, Младеновиќ, Серафимов 11, Карасманакис, Стојковиќ 1, Ѓоргиев 1, Велковски 2, Ивановски 2, Бинго 4, Франциско 2, Петковски 4, Митев 2, Савревски, Гарбески
Седмерци: 8/10 Исклучувања: 10 мин.
РК БУТЕЛ СКОПЈЕ: Стојаноски, Блажевски, Субашевски 1, Тодески 5, Ѓеоргиевски 2, Николов 11, Новаковски, Спасовски 1, Т. Узунчев 1, Д. Узунчев, Милошески, Киселовски, Каевски, Михајловиќ 4, Шолиќ 3, Давитковски 1
Седмерци: 1/2 Исклучувања: 16 мин. 

РК Алкалоид ја запиша третата плејоф победа во македонската Суперлига. Само со еден ден пауза по натпреварот од полуфиналето на ЕХФ Европскиот Куп, во домашното првенство во Автокоманда гостуваше екипата на РК Бутел Скопје.
РК Алкалоид запиша победа од 33-30 и освои нови два бода до кои дојде потешко од вообичаено, но и во согласност со очекувањата имајќи го предвид распоредот на одиграни и на натпреварите што претстојат.

Дуелите меѓу РК Алкалоид и РК Бутел Скопје имаат своја тежина и шарм на градско дерби, па така беше и вечерва. Гостите се прикажаа во борбено издание и беа резултатски рамноправни, но РК Алкалоид беше екипата што го диктираше резултатот во текот на сите 60 минути и ниту еднаш не беше во негатива.

РК Алкалоид водеше од почетокот, а гостинскиот состав успеваше да израмнува се до резултат 9-9. Потоа РК Алкалоид поведе со два гола разлика (11-9), потоа и со 12-9 и 13-10 и разликата ја одржа до полувремето.

Во вториот дел, РК Алкалоид имаше и плус четири (17-13), но гостинскиот состав влезе во ритам и успеа да израмни на 17-17.
Потоа одново почна игра гол за гол, а набрзо РК Алкалоид имаше одново водство од три гола 23-20, по што до крајот на мечот разликата се движеше меѓу два и три гола.
Имаше РК Алкалоид шанса да зголеми и на плус четири, има имаа и гостите шанса да намалат на минус еден, но не се случи ниту едното ниту другото по вина на голманите кои беа фокусирани во тие моменти. Во финишот на натпреварот, РК Алкалоид стигна до максималната разлика (33-29), а гостите само го ублажија поразот. 

РК Алкалоид веќе во недела ќе игра нов голем меч, гостува во Норвешка каде што во реваншот од полуфиналето ќе стартува со пет гола предност во одност на домашниот Рунар Сандефјорд.