РК БУТЕЛ СКОПЈЕ – РК АЛКАЛОИД 20-22 (9-11)
Сала: „Антон Димитров“ во Скопје. Судии: Димитар Митревски и Благојче Тодоровски. Делегат: Марјан Начевски

РК БУТЕЛ СКОПЈЕ: Симјановски, Субашевски, Младеновски 2, Стојановски, Ѓеоргиевски 2, Николов 7, Крстевски, Мојсоски 4, Спасовски, Стојчевиќ, Манасков 1, Блажевски 1, Јефтиќ, Михајловиќ, Мајиќ 2, Давитковски 1
Седмерци: 4/8 Исклучувања: 10 мин.

РК АЛКАЛОИД: Трајкоски, Галевски, Џонов 3, Маркоски 2, Стојков, Младеновиќ 1, Серафимов 7, Илиески, Стојковиќ, Ѓоргиев 2, Симоноски 1, Омерагиќ 1, Кофилоски, Петковски 2, Д. Митев 2, Савревски
Седмерци: 2/4 Исклучувања: 14 мин.

РК Алкалоид вечерва запиша нова плејоф победа. Нашиот тим на гостински терен славеше над градскиот ривал РК Бутел Скопје со резултат 22-20.
Ова беше деветта победа на РК Алкалоид во плејоф-разигрувањето со што стигна до бројката од 30 освоени бодови.
Дуелот со Бутел Скопје беше резултатски интересен, што е пракса кога играат овие два тима. Бутел поведе со 3-0, но РК Алкалоид израмни на 4-4 по 15 минути игра, а потоа поведе со 6-4 и полека почна да ја презема контролата.
Домашните само уште двапати поведоа на оваа средба, (8-7 и 9-8), а потоа до крајот на мечот резултатската контрола беше за нашиот тим.

Благојче Трајкоски имаше запазена улога и успеваше да запре важни удари, а Алкалоид поведе со 11-9 и тоа беше резултат на полувреме.
Со два гола на стартот на вториот дел, РК Алкалоид поведе со четири гола разлика (13-9), а потоа таа разлика ја одржа во следниот период во кој се играше во рамки на разлика од два до четири гола предност за нашиот тим.
Во финишот домашните намалија на 20-22, но Алкалоид добро го контролираше времето и без поголема драма успеа да стигне до победата.

РК МУЛТИ ЕСЕНС – РК АСТРАИОН 52-25 (24-9)
Сала: „Автокоманда“ во Скопје. Судии: Исмаил Металари и Ненад Николовски. Делегат: Мамер Реџепи
РК МУЛТИ ЕСЕНС: Штаковски, Ерманоски, Димевски 6, Грујевски 4, Димитриевски 6, Д. Узунчев 5, Омерагиќ 2, Алексовски 3, Велков 1, Т. Узунчев 4, Јорданов 1, Карасманакис 7, Ниновски 6, Костовски 3, Георгиевски 3, Трајчев 1
Седмерци. 3/4 Исклучувања: 8 мин.

РК АСТРАИОН: Наумов, Георгиев 2, Ефтимов 1, Наков 9, К. Катранџиев 1, Котевски 1, Перовановиќ, В. Стојанов, М. Стојанов 1, Пандец 1, Гогов, Д. Катранџиев 3, Ангелов
Седмерци: 3/3 Исклучувања: 8 мин.

РК Мулти Есенс запиша уште една убедлива победа и дојде на чекор од остварување на амбициите, пласман во повисок ранг на натпреварување.
РК Мулти Есенс во заостанатиот натпревар од 14 коло, на домашен терен ја совлада екипата на РК Астраион со високи 27 гола разлика (52-25). Ова беше 14 плејоф победа за нашиот тим, од 14 одиграни натпревари.

Нашиот тим беше убедлив од првиот до последниот момент на натпреварот. Поведовме со 8-2, 13-4 и предноста до полувреме ја зголемивме на 24-9.
Во вториот дел се играше во речиси ист ритам, а РК Мулти Есенс речиси ја удвои предноста од првиот дел.
Во следното коло, во „Автокоманда“ ќе играме против екипата на Металург РА.

РК ДРАЧЕВО – РК МУЛТИ ЕСЕНС 31-34 (15-15)
Сала: „Круме Кепески“ во Скопје. Судии: Александар Вукашиновски и Мирко Трајковски. Делегат: Цане Куртовиќ

РК ДРАЧЕВО: Христов, Дабевски 4, Ристовски, Димовски 2, Божинов, Димов 2, Стојанов 4, Петковски 5, Стојановски, Ангеловски, Андовски, Анѓелковски 4, Бадаревски, Вељаноски, Дука 10
Седмерци: 1/1 Исклучувања: 10 мин.

РК МУЛТИ ЕСЕНС: Штаковски, Димевски 7, Грујевски, Димитриевски 1, Д. Узунчев 12, Тричковски 5, Омерагиќ 1, Велков, Ерманоски, Младеновски, Т. Узунчев, Јорданов 3, Карасманакис 2, Костовски 3, Георгиевски
Седмерци: 8/10 Исклучувања: 12 мин.

РК Мулти Есенс направи голем чекор напред кон пласманот во Супер лигата. Откако во минатото коло славеше победа над РК Аеродром, вечерва го совлада и вториот ривал во трката за првите две места – РК Драчево.

РК Мулти Есенс забележа победа од 34-31 на гостински терен по 13 комплетирани кола има 13 победи. Со вкупно 39 освоени бодови, РК Мулти Есенс има предност од 11 бода пред споментите ривали на пет кола до крајот на сезоната.

Вечерва, домашниот состав тргаа силовито и беше во водство во текот на целото прво полувреме, на моменти и со шест гола разлика (13-7).
Нашиот тим покажа карактер и не потклекна, туку го засилуваше ритамот и влезе во серија од 5-0 со која намали на 12-13 и му направи притисок на домашниот состав.
На полувреме се замина со нерешени 15-15, а веднаш на стартот на вториот дел, момците предводени од Бранко Ангеловски беа растрчани и видно посвежи од противничкиот тим.

Со два гола на почетокот на вториот дел, нашиот тим премина во водство од 17-15, а потоа го зголемуваше притисокот и стигна и до водство од 26-20, 27-21…
Домашниот тим имаше обид да се врати резултатски во игра, на пет минути до крајот намали на минус два гола разлика, но РК Мулти Есенс ја зачува ладнокрвноста и не дозволи резултатска драма.

РК АЛКАЛОИД – ГРК ОХРИД 31-23 (15-10)
Сала: „Автокоманда“ во Скопје. Судии: Спаско Ќаев и Глигор Ќаев. Делегат: Цане Куртовиќ

РК АЛКАЛОИД: Галевски (14 одб), Трајкоски, Петров, Маркоски 2, Стојков 2, Серафимов 6, Стојковиќ 2, М. Митев 2, Ѓоргиев 4, Симоноски 4, Омерагиќ, Тодески, Кофилоски 4, Петковски, Д. Митев 3, Савревски 3
Седмерци: 5/5 Исклучувања: 8 мин.

ГРК ОХРИД: Миленковиќ, Речкоски, К. Андоновски, Цејовиќ, Рустамов 6, Дрогришки 1, Цинцадѕе, Д. Андоновски 2, Василевски, Ристески, Тасески 4, Шешиќ 2, Каракоч 2, Бојаниќ 1, Цирар 5
Седмерци: 3/5 Исклучувања: 8 мин.

РК Алкалоид го совлада ГРК Охрид во дербито на колото и по 11 одиграни кола има предност од 15 бода пред четвртопласираниот тим со што го завери пласманот на третото место кое, пак, носи пласман во Европската лига следната евро-сезона.
Вечерва, РК Алкалоид одигра уште еден добар натпревар против охридскиот ривал. Тренерот Кирил Лазаров одново шанса да стартуваат натпревар им даде на дел од помладите ракометари, а повторно 18 годишниот голман Иван Галевски одлично ја искористи укажаната шанса и имаше двоцифрен број на одбрани меѓу кои одбранети пенали, зицери и тешки шутеви.

Иван Галевски беше стартерот што ја раздвижи екипата на РК Алкалоид која по воведните 2-2 за десет минути игра, во следните пет минути направи серија од 6-0 со која стигна до водство од 8-2, а тоа се понатаму се покажа и како клучен период за конечниот епилог и се што му претходеше во 45 минути помеѓу.

Гостинскиот состав имаше обид да се врати резултатски во игра и тоа донекаде му успеа. Со три гола во серија негативата од 2-8 ја претвори во достижен минус (5-8), но овде и беше запрен налетот на гостинскиот состав.
Нашиот тим ја врати контролата врз настаните на теренот, неколку минути се играше околу разликата од три гола, а потоа одново поведовме со поголема разлика, од пет погодоци (12-7) што ја одржавме до крајот на полувремето кое заврши со резултат (15-10).

Во второто полувреме, развојот на настаните, особено резултатски беа речиси идентични како во првиот дел. Нашиот тим поведе со 18-12, а гостите со серија од 3-0 намалија на 15-18 и тука одново беше запрен нивниот налет.
Потоа се играше посмирено, без поголеми серии на која било страна сѐ до финишот на мечот. Одново РК Алкалоид беше поконкретен во завршницата и стигна до победа од осум гола разлика (31-23).

Ова беше претпоследен меч на домашен терен за РК Алкалоид. Во следното коло му гостуваме на РК Бутел Скопје, потоа во „Автокоманда“ го пречекуваме тимот на РК Е. Пелистер 2 и во последното коло сезонава, ќе играме на гости кај РК Вардар 1961.

РК Т. ПРОЛЕТ – РК АЛКАЛОИД 22-28 (11-14)
Сала: „Македонско сонце“ во Скопје. Судии: Рубин Седлоски и Горан Ангелески. Делегат: Камер Металари
РК Т. ПРОЛЕТ: Петковски, Василевски 6, Пецаковски 4, Додевски, Димов 2, Андоновски 4, Мајнов, Димковски 2, Крстески 2, Стојановски 1, Фичорски, Јанчев, Михаљевиќ, Палевски, Спасовски 1
Седмерци: 4/5 Исклучувања: 8 мин.
РК АЛКАЛОИД: Галевски, Трајкоски, Петров 2, Маркоски 1, Стојков 5, Младеновиќ, Серафимов 3, Стојковиќ, М. Митев 3, Ѓоргиев 5, Симоноски, Омерагиќ 1, Кофилоски 1, Петковски 1, Д. Митев 2, Савревски 4
Седмерци: 3/4 Исклучувања: 2 мин.

РК Алкалоид ја запиша седмата победа во плејоф-првенството. Вечерва нашиот тим славеше победа над РК Тинекс Пролет, на гостински терен со резултат 28-22.

РК Алкалоид по почетното водство на противникот од 2-1, ја преземе комплетно контролата во следниот период и поведе со (4-2, 7-4, 10-6). Тренерот Кирил Лазаров, на овој натпревар им даде поголема шанса на играчите што не се стартери, а таквата шанса одлично ја искористија голманот Иван Галевски, бековите Дамјан Митев, Давид Савревски и Едвин Омерагиќ, пикерот Марко Стојковиќ и крилото Александар Стојков.

Домашниот тим не падна во ритамот и одржуваше негатива од три до четири гола во првиот дел. На полувреме беше 14-11 за РК Алкалоид.

Во второто полувреме, нашиот тим одново стигна до водство од четири гола (16-12), а потоа се играше период во кој нашето водство се движеше од два до три гола разлика.
Домашниот состав имаше обид да направи пресврт и еден момент успеа да стигне до израмнување (20-20). Но, РК Алкалоид ја задржа присебноста и до крајот на натпреварот постигна осум, а прими само два гола за конечни 28-22.

Пред почетокот на натпреварот, раководните луѓе на РК Т. Пролет му врачија благодарница на нашиот ракометар Иван Џонов кој во зимскиот преоден рок премина од редовите на РК Т. Пролет во нашиот клуб.

Со оваа победа РК Алкалоид стигна до 24 освоени бода, 12 повеќе од ГРК Охрид кој е зад нас на табелата и со кого во петок ќе ги одмеруваме силите во „Автокоманда“.

РК МУЛТИ ЕСЕНС – РК АЕРОДРОМ  28-26 (14-12)
Сала: „Автокоманда“ во Скопје. Судии: Ѓорѓе Василевски и Блаже Михајлов. Делегат: Мамер Реџепи
РК МУЛТИ ЕСЕНС: Штаковски, Грујевски, Д. Узунчев 8, Тричковски 1, Омерагиќ 4, Велков, Ерманоски, Младеновски, Т. Узунчев 1, Продановски, Јорданов 9, Карасманакис 4, Костовски, Георгиевски, Иванов 1, 
Седмерци: 4/5 Исклучувања: 6 мин.

РК АЕРОДРОМ: Богдановски, Кизиќ, Пајкоски 4, Бучуковски 3, Бошковски 3, Миревски 4, Костов 2, Петровски, Таневски, Олтовски 2, Стојановски, Трифуновски 4, Неданоски, Василев, Анакиевски, Петрески 3
Седмерци: 1/1 Исклучувања: 6 мин.

РК Мулти Есенс ја забележа својата 12 победа од 12 одиграни натпревари. Ова е една од највредните победи затоа што е извојуван над директен ривал во битката за влез во Суперлигата – РК Аеродром.

Интересен и возбудлив натпревар одиграа екипите на РК Мулти Есенс и РК Аеродром. Двата тима се на врвот на листата на фаворити за влез во суперлигата, а денешниот меч беше потврда дека и двете екипи имаат потенцијал да се натпреваруваат во најсилната конкуренција и да донесат нови моменти во македонскиот ракомет, со оглед на тоа дека знаат да играат брз ракомет.

Почетното водство на РК Мулти Есенс од 4-2, гостите со серија од 4-0 го претворија во водство од два гола разлика за нив. Предводени од Олег Јорданов, ракометарите на РК Мулти Есенс брзо го возвратија ударот и поведоа со три гола разлика (11-8).

На полувреме резултатот беше 14-12 за РК Мулти Есенс, а во вториот дел одново стигнавме со плус три (17-14), по што следуваше израмнување на 18-18, па уште една домашна серија за водство од 22-19. Потоа имавме и водство од 24-21 во 49 минута од мечот.

Гостинскиот состав успеа да израмни одново на 25-25 во 56 минута од натпреварот. Нашиот тренер, Бранислав Ангеловски по ова побара минута одмор, а потоа со головите на Омерагиќ и Тричковски на двапати се враќавме во водство.
Клучен момент во финишот беше одбраната на Ѓорѓи Ерманоски на минута и пол до крајот при резултат 27-26, по што следеше гол од Димитар Узунчев со кој ја зачувавме разликата и запишавме нови три бода.