РК АЛКАЛОИД – РК ЕУРОФАРМ ПЕЛИСТЕР 32-25 (16-12)
Сала: „Автокоманда“ во Скопје. Судии: Ѓорѓи Начевски и Славе Николов. Делегати: Марјан Начевски и Ацо Николовски
РК АЛКАЛОИД: Кизиќ (8 одб), Галевски (1 сед), Џонов, Маркоски, Костески 5 (2), Младеновиќ, Серафимов 8 (4), Карасманакис 1, Стојковиќ 2, Митев 2, Ѓоргиев 3, Велковски 4, Симоноски 1, Бинго 6, Силва, Петковски
Седмерци: 6/6 Исклучувања: 14 мин
РК ЕУРОФАРМ ПЕЛИСТЕР: Митревски (11 одб), Ивиќ, Манасков 3, Цехте, Ристевски 2, Ц. Кузманоски 1, Тајник, Борзаш, Радивојевиќ 2, Ф. Кузмановски 12 (6), Абутовиќ, Пешевски 1, Ѓорговски, Хосни 1, Хаџиќ, Павле Атанасијевиќ 3
Седмерци: 6/7 Исклучувања: 8 мин.

РК Алкалоид ја запиша осмата првенствена победа од исто толку одиграни натпревари, а таа е посебно важна затоа што е извојувана на дерби натпревар со актуелниот првак РК Еурофарм Пелистер.
РК Алкалоид на премиерниот меч од сезоната, на Суперкуп дуелот исто така славеше победа над РК Еурофарм Пелистер, но вечерашниот натпревар имаше сосема поинаков ритам, тек и конечен епилог.

РК Алкалоид почна брзо, одбраната функционираше на добро ниво и за само пет минути успеа да направи резултатска предност од три гола разлика 4-1. Голманот на битолскиот состав, репрезентативецот Никола Митревски успеа да скроти неколку напади во продолжение, а гостинските ракометари тоа го материјализираа и успеаја да се вратат резултатски во игра.
Никола Костески и Арно Бинго играа одличен натпревар во оваа фаза, а екипата брзо се консолидираше и најмногу што гостите успеаја да направат е израмнување на 6-6. Веднаш потоа следеше одговор и два гола во мрежата на РК Еурофарм Пелистер за ново водство од два гола разлика (8-6), а потоа таа разлика од еден-два гола беше актуелна десетина минути.
РК Алкалоид играше одличен меч, колективот функционираше на високо ниво, па наскоро следеше нов добар период по кој резултатот се искачи на 14-9.
Таа разлика ја одржа до крајот на првиот дел, по кој на семафорот беше 16-12.

Во второто полувреме, добрата колективна игра на РК Алкалоид уште еднаш даде резултат, па водството порасна и на шест-седум гола разлика, а мечот се играше во ритам гол за гол.
Пех за РК Алкалоид на денешниот натпревар е повредата на Никола Костески кој во 38 минута мораше да го напушти теренот.
Ритамот не се промени, нивото на игра остана високо и наскоро РК Алкалоид поведе и со максимални осум гола разлика (30-22).

До крајот на натпреварот бодрени од расположената публика, ракометарите на РК Алкалоид контролираа сѐ на теренот и запишаа убедлива победа од седум гола разлика.
Со оваа победа РК Алкалоид ја одбрани и разликата од два бода на првото место на табелата пред другите суперлигашки ривали.
Следниот натпревар за РК Алкалоид е закажан во сабота, во литванскиот град Клаипеда, каде што ќе го игра реванш мечот од второто коло на ЕХФ Европскиот Куп. Резултатот од првата средба е 42-31 за РК Алкалоид.

КИРИЛ ЛАЗАРОВ, ТРЕНЕР НА АЛКАЛОИД:
Вистинско дерби, одигравме многу квалитетно, ова е можеби една од нашите најдобри партии. Еурофарм Пелистер, беше под своите можности, не знам дали можеби и ние придонесовме за тоа или се малку уморни од натпреварите во Лигата на шампионите. Јас сум го играл ова и знам дека не е лесно, да се игра ваков натпревар, а веќе со мислите да си и на дуелот со Веспрем. Ние имаме максимална почит кон нив, нивниот цел тим.
Среќни сме и задоволни, реков уште по натпреварот со Клаипеда, задоволен сум од тоа како функционираме. Некој ја чувствува и вреднува таа победа, некој не, но јас почувствував дека тоа е тоа. Се одморивме, се потспремивме за ден – ден и пол.
На сите играчи им симнувам капа, на сите како тим. Им кажав дека не ми е важно кој ги постигнува головите, важно е да функционираме како тим. И засега е така и се надевам дека ќе продолжиме така“, изјави Лазаров.

РК АЛКАЛОИД – КЛАИПЕДА ДРАГУНАС 42:31 (18:12)
Сала: „Автокоманда“ во Скопје. Судии: Ердоган Витаку и Арсим Витаку од Косово. Делегат: Искандар Азгаров од Азербејџан
РК АЛКАЛОИД: Кизиќ (1 одб), Галевски 1 (9 одб), Џонов, Маркоски, Костески 10, Младеновиќ 1, Серафимов 6, Карасманакис 1, Стојковиќ 4, Митев 5, Ѓоргиев 4, Велковски, Симоноски 1, Бинго 9, Петковски, Савревски,
Седмерци: 6/7 Исклучувања: 10 мин.
КЛАИПЕДА ДРАГУНАС: Пакалнискис (9 одб), Коржук 1, Одиноков 2, Симонавичиус 4, Бучиус 2, Љапинаискас 4, Пуликас, Јускенас 2, Драксас 1, Цесна 1, Сматаускас 4, Буткус 6, Кајрус, Плахотињ, Стропус 4
Седмерци: 2/5 Исклучувања: 4 мин.

РК Алкалоид успешно стартуваше во ЕХФ Европскиот Куп и ја запиша својата втора европска победа. Вечерва на првиот меч од второто коло во ЕХФ Европскиот Куп, РК Алкалоид ја совлада екипата на Клаипеда Драгунас од Литванија со убедлива разлика од 11 гола.

Натпреварот имаше брз ритам од првиот момент, игра што му одговараше и на РК Алкалоид кој преферира да игра ракомет со многу трчање и брза транзиција. РК Алкалоид поведе 3-1, но и гостинскиот состав покажа дека има квалитет во нивните редови и дека добро се снаоѓа во натпревар со брз ритам, па во следните десет минути се играше израмнето.

Откако помина почетното испитување на силите и одбраната на РК Алкалоид стана посигурна и поцврста, почна да се прави и резултатска разлика. Одлична партија имаше голманот Иван Галевски кој имаше неколку успешни интервенции, по кои беа постигнати и лесни голови и РК Алкалоид почна да влегува во препознатлив ритам. Одличен натпревар одиграа и крилните играчи Костески и Бинго кои предничеа во транзиција и постигнуваа атрактивни погодоци.

По 15 минута, следеше најефективниот период во играта на сино-белите кои од резултат 9-9, дојдоа до водство од 17-10 и тоа му даде сосема поинаков тон на натпреварот.
На крајот на првиот дел резултатот беше 18-12, а во второто полувреме ритамот на играње остана ист. Гостите се обидоа и со подлабока зона и не го намалија темпото па брз ракомет се играше до крајот на натпреварот.
РК Алкалоид водеше од шест до девет гола разлика во оваа фаза од средбата, а во 50 минута беше 33-24. Разликата прв пат стана двоцифрена во 52 минута (35-25). Потоа стигна и до максималните 12 гола разлика, за на крајот средбата да заврши со резултат 42-31.

РК БИСИНОВ ФРУИТЛЕНД – РК АЛКАЛОИД 22-40 (9-18)
Сала: „Гемиџии“ во Велес. Судии: Сашо Јанкулоски и Мартин Јовановски. Контролор: Душко Камишевски
РК БИСИНОВ ФРУИТЛЕНД: Паунов, Димов 1, Стојановски 1, Трајковски 5, Ивчевски, Иванов, Димитров 1, Заров, Табаков, Сиљанов, Солев, Илиев 7, Ристевски 2, Стојменов 1, Ончев 4, Митревски
Седмерци: 4/5 Исклучувања: 6 мин.
РК АЛКАЛОИД: Кизиќ, Галевски, Џонов 3, Петров 2, Маркоски, Костески 1, Младеновиќ, Серафимов 5, Карасманакис 1, Митев 7, Велковски 2, Симоноски 4, Бинго 2, Силва 4, Петковски 6, Савревски 3
Седмерци: 1/2 Исклучувања: –

РК Алкалоид ја запиша и седмата победа на седмиот одигран натпревар во годинешната Суперлига. На гостински терен во Велес, РК Алкалоид беше подобар од домашниот тим РК Бисинов Фруитленд и сега во исчекување на епилогот на дербито што во недела во Битола ќе го играат екипите на РК Еурофарм Пелистер и ГРК Охрид, го презема првото место на табелата.

Вечерва во Велес, РК Алкалоид стартуваше посилно, веднаш до израз дојдоа разлики во играта на двата тима, а резултатот за кратко време стана 7-2. Потоа се смири пулсот на натпреварот, но остана разликата која се движеше меѓу четири и пет гола разлика. Велешани во еден момент намалија и на минус три (8-11), но веднаш следеше одговор од нашиот тим во вид на серија од 5-0 и најголемо водство до тој момент од осум гола разлика (16-8).
На полувреме резултатот беше 9-18.

Првиот гол во второто полувреме беше за плус 10 разлика, прв пат на натпреварот, а потоа тие рамки се движеше резултатот се до средината на полувремето. Потоа до поголем израз и подготвеноста, па предноста продолжи да расте се до конечните 40-22.

​РК АЛКАЛОИД – РК СТРУГА 35-20 (17-7)
Сала: „Автокоманда“ во Скопје. Судии: Рубин Седлоски и Горан Ангелески. Контролор: Илија Цветкоски
РК АЛКАЛОИД: Кизиќ, Трајкоски, Џонов 2, Петров, Костески 13, Младеновиќ 4, Серафимов 1, Карасманакис 1, Стојковиќ 1, Ѓоргиев 2, Велковски 1, Симоноски, Бинго 5, Силва 2, Петковски 1, Савревски 2
Седмерци: 2/3 Исклучувања: 6 мин.
РК СТРУГА: Тутенкоски, Мечкароски, Џигероски 2, Наумоски, Кленковски, Јанкуловски, Клењоски, Симоноски, Великиќески, Матески, Савески 2, Ф. Мечкароски 4, Костоски 3, Мијушковиќ 6, Пајкоски 3, С. Мечкароски
Седмерци: 3/3 Исклучувања: 8 мин.

РК Алкалоид ја запиша шестата победа од шест одиграни натпревари во суперлигашката конкуренција. На последниот натпревар од шестото коло, гостин во Автокоманда беше екипата на Струга, а натпреварот заврши со убедлива победа на РК Алкалоид.

РК Алкалоид целосно ја оправда улогата на фаворит и уште од почетокот на натпреварот ја имаше комплетната контрола врз настаните на теренот. Во воведните минути поведе со седум гола разлика (9-2) и потоа со помирен ритам ја одржуваше дистанцата, а и го зголеми водството. Во овој дел се најефикасен беше крилниот играч Никола Костески кој првиот дел од натпреварот го заврши со девет постигнати гола, а резултатот на полувреме беше 17-7.

Во второто полувреме се играше резултатски израмнето, со тоа што РК Алкалоид имаше водство од 8-10 гола разлика, а во вториот дел од полувремето уште еднаш влезе во серија (9-1) и на крајот победата беше изразена со 15 гола разлика.

Во следното коло, РК Алкалоид ќе гостува на РК Бисинов Фруитленд, а потоа го очекува и првиот натпревар од ЕХФ Куп на домашен терен против Клаипеда Драгунас од Литванија.

ГРК ТИКВЕШ – РК АЛКАЛОИД 25-31 (13-19)
Сала: „Јасмин“ во Кавадарци. Судии: Ненад Николовски и Исмаил Металари. Делегат: Драган НачевскиГРК ТИКВЕШ: Арсиќ, Велков, Анастасовски 3, Петрески, Мијатовиќ 3, Темелкоски, Соколов, Кофилоски 2, Димовски, Лазов, Манасков 2, Коцев 2, Летиќ, Кривокапиќ 3, Даневски, Обина 7
Седмерци: 7/8 Исклучувања: 6 мин.

РК АЛКАЛОИД: Кизиќ, Галевски, Џонов 2, Маркоски, Костески 3, Младеновиќ, Серафимов 5, Карасманакис 1, Стојковиќ 2, Митев 6, Ѓоргиев 2, Велковски 4, Симоноски 1, Бинго 1, Силва 1, Петковски 3
Седмерци: 4/6 Исклучувања: 8 мин.

Петтата победа од пет одиграни натпревари во Суперлигата ја запиша екипата на РК Алкалоид на гостински терен во Кавадарци против екипата на ГРК Тиквеш. Кавадарчани традиционално се непријатен противник на РК Алкалоид, особено кога играат на домашен терен. Денешната средба немаше големи резултатски возбудувања, но не изостана борбениот натпревар на моменти со агресивни дуели.

РК Алкалоид беше подобриот противник во првото полувреме уште од почетната минута. Поведоа со 3-1 избрниците на Кирил Лазаров и од тој момент постојано имаа гол или два предност во однос на борбениот домаќин.
Како што минувaше времето до поголем израз доаѓаше и физичката подготвеност и воиграноста на РК Алкалоид. Во последните десет минути доминацијата беше појасно изразена и предноста порасна на максимални шест погодоци (19-13).

Почетокот на вториот дел не беше по волја на РК Алкалоид затоа што ефикасноста беше видно намалена.
Домашниот состав успеа во почетните осум минути да намали три гола од негативата (16-19), блгодарение на неколку промашувања на нашиот состав, меѓудругото и на два седмерци во овој период.

Но, не траеше долго таа серија. Одбраната почна да функционира и му олесни на напаѓачкиот дел од тимот, па во 45 минута дојде и новата најголема предност од седум гола (24-17).
Мал пад во концентацијата на РК Алкалоид ги врати до одреден степен во игра домашните кои со серија од 4-0 намалија на 21-25, а малку подоцн5.а имаа напад и за да намалат на минус два. Брзо мина тој период на непријатност, РК Алкалоид брзо ја врати контролата и се врати на безбедни и солидни плус пет гола, за конечно натпреварот да го заврши со победа од 31-25.

Наменски дизајнираните маички со лајтмотив – индивидуалната енергија како експресија низ теоријата на бои – симболизираше пропусница за пикникот, преку која семејството алкалоидовци и пријателите до денес донираа околу 2 милиони денари.„Алкалоид“ АД Скопје ја продолжи хуманата мисија на 10-тиот по ред донаторски хепенинг по неколкугодишна пауза која се должеше на пандемиските ограничувања. Хуманитарниот пикник беше спроведен под закрила на Фондацијата „Трајче Мукаетов“ во присуство на вработените, членовите на нивните семејства и/или нивни пријатели.
Ракометарите на РК Алкалоид беа дел од овој настан и го збогатија хуманитарниот пикник со своето присуство.

„Денес заокруживме значаен, 10-ти јубилеј на колективна солидарност на собирот кој прерасна во празник на хуманоста за сите алкалоидовци. Околу три илјади наши колеги и пријатели донираа средства преку Фондацијата ’Трајче Мукаетов’, кои ќе бидат наменети за СОС Детско село. Со оваа организација отпочнавме стратешка соработка во 2022 година со цел да ги олесниме тековните трошоци за децата под нивна закрила, едукативна поддршка, пристап до професионално советување и слично зашто секое дете заслужува посреќно и побезгрижно детство.“

Директорката за обезбедување фондови и комуникации на СОС Детско село, Силвија Брајовиќ, истакна : „Со ’Алкалоид’ веќе три години нè поврзува едно прекрасно партнерство, кое не само што ја покажува нивната посветеност како компанија туку и искрената грижа за најранливите во нашата заедница – децата без родителска грижа. Донацијата претставува продолжување на трета година кумство и поддршка на едно згрижувачко семејство за тековни животни трошоци и развојни потреби на децата, кои добиваат не само материјална помош, туку и љубов, сигурност и припадност“

Соработката на „Алкалоид“ со македонската гранка на организацијата „СОС Детско село“ отпочна во 2022 година кога една од куќите на локалитетот во населба Ченто беше именувана во „Бекутан куќа“, за која компанијата ги покри трошоците за секојдневното функционирање. Во 2023 година, по повод 45-годишниот јубилеј на брендот „Бекутан“, се издвојуваше одреден процент од продажбите на оваа детска колекција и беа собрани над 2 милиони денари донирани на оваа организација. „СОС Детско село“ во моментов се грижи за близу 500 деца и младинци во земјава кои се без родителска грижа или се во ризик да ги изгубат своите родители. Организацијата функционира на принципот на донации од индивидуалци, компании, институции и разни форми на партнерства. Секој може да донира, а донираните средства се користат исклучиво за потребите на згрижените деца.

Линк за донации: https://sos.org.mk/doniraj-33/