Ракометарите, стручните тимови и раководството на РК Алкалоид го одбележаа крајот на овогодинешната сезона, трета во историјата на клубот во која се сретнаа и успешно се носеа со многу нови предизвици меѓу кои е и дебитантскиот настап во Европската лига на ЕХФ, големите дерби мечеви во суперлигашкиот плејоф, историскиот настап и прв пехар во Куп на Македонија, шампионските пехари во пионерска, кадетска и младинска конкуренција и сето тоа проткаено со успешниот настап и големата одговорност што ја носат нашите ракометари со сениорската репрезентација, но и во помладите репрезентации.

Прес конференција и коктел дружење беше организирано по повод крајот на сезоната во присуство на нашите ракометари. Пред медиумите зборуваа претседателот на клубот Горан Минов, тренерот Кирил Лазаров и капитенот Игор Ѓорѓиев.

Кратка ретроспектива на сезоната со акцент на остварените резултати даде претседателот на клубот Горан Минов.

„Завршивме сезона која беше посебна за нас за многу работи, затоа што имавме многу нови предизвици. Се соочивме со нови моменти, како настап во Европа, кој настрана спортскиот и резултатскиот дел, бараше од нас и друг пристап којшто е организациски. Нашата сениорска екипа успешно се претстави во Европската лига на ЕХФ каде игравме со реномирани противници и ги освоивме првите бодови. Успешно и на високо ниво одигравме три европски средби и го положивме тој организациски дел со голема оценка, што за нас беше голем испит. На домашната сцена изборивме место во Европа, а посебна сатисфакција е освоениот Куп на Македонија. Посебно не радуваат успесите на младинските категории, во кои станавме прваци во пионерска, кадетска и младинска категорија. Со макотрпна, но стратегиски успешна работа, изградивме систем во кој сите се вклопија. Успеавме на ракометарите да им вградиме победнички менталитет, тоа ни донесе и успех. Нашата мисија е да дадеме идни македонски репрезентативци кои ќе ја радуваат Македонија во спортот број еден за нас. Сакам да изразам особена благодарност до Алкалоид АД Скопје и Живко Мукаетов, кој како главен покровител ни ги овозможи овие врвни услови за работа. Исто така, голема благодарност до стручниот штаб на чело со Кирил Лазаров како и ракометарите кои максимално се вложија оваа сезона да биде за нас најдобрата и најуспешна до сега. Благодарност до колегите, медиумите и навивачите кои ни беа голема поддршка“, изјави Горан Минов.

Тренерот на екипата Кирил Лазаров зборуваше за предизвиците низ кои минуваше екипата сезонава и ја најави следната сезона во која клубот ќе се стреми за чекор напред и во домашниот шампионат и на eвропската сцена.

„Клубот е формиран пред три години, но ние го одбравме потешкиот, но знам дека е вистинскиот пат, иако се соочуваме со многу препреки. Го одбравме македонскиот пат, работиме добро и за клубот, за државата, за македонскиот спорт и македонскиот ракомет. Се надевам дека и во иднина ќе продолжиме по тој пат иако воопшто нема да биде лесно, затоа што македонската лига од година во година расте. Оваа сезона имавме доминантно претставување во првиот дел, завршивме со 14 победи на 14 меча, а потоа успеавме да освоивме и титула во Купот во кој во неполни 72 часа, чесно и посветено, ги победивме двата најконкурентни тимови. Тоа е голем успех за нас и голема сатисфакција за во иднина дека треба да продолжиме по тој пат и да веруваме, но истовремено да знаеме дека патот ќе биде уште потежок. Завршивме на третото место во плејофот, излеговме во Европа, за нас Европскиот куп на ЕХФ, е вистинскиот и се надевам дека таму ќе бидеме повеќе конкурентни и ќе минеме повеќе кола. Но, морам да истакнам дека посебно ми е драго што успеавме да направиме успеси во младинските категории. во иднина апелирам до раководството на клубот уште повеќе да се вложува во овие категории затоа што тоа е иднината на македонскиот ракомет. Апел до другите клубови да не гледаат конкуренти во нас, туку да инвестираат во млади играчи, затоа што само така може ракометот да го задржи приматот спорт број еден во Македонија.“ , изјави Кирил Лазаров.

Капитенот Игор Ѓорѓиев изјави дека е горд што крај себе има соиграчи-професионалци и на сите им честита за успехот во сезоната на која се спушта завесата.

„Завршуваме една успешна сезона на РК Алкалоид. Нашиот тим сезонава го донесе првиот трофеј во витрините на клубот, тоа е Купот на Македонија, успех на кој посебно сме горди. Игравме и во Европската лига на ЕХФ каде имавме шест квалитетни натпревари со кои стекнавме големо искуство и за нас како млада екипа ќе ни служи многу за наредниот период. Следната сезона повторно ќе играме во Европа, јас како капитен можам да кажам дека сме задоволни од покажаното и нашето издание. Наша главна цел е да играме добар, пред се европски ракомет и со тоа да ја радуваме нашата Македонија. Благодарност до условите кои ни ги овозможи Алкалоид, благодарност до соиграчите кои беа големи професионалци и големи работници. На крајот најмногу сакам да се заблагодарам на нашата публика која неуморно не бодреше цела сезона, со таква поддршка ветуваме борба, залагање и многу поголеми успеси“, изјави Игор Ѓорѓиев.

По обраќањето на присутните, РК Алкалоид им додели подароци и се поздрави со двајца ракометари. Левото крило Дарио Кофилоски и голманот Виктор Василевски си заминуваат од нашиот колектив. Клубот им се заблагодарува за досегашниот придонес, лојалност и посветеност и им посакува успех во натамошната кариера.

РК Алкалоид предвидено е да ги почне подготовките за новата сезона на 25 јули.

РК ВАРДАР 1961 – РК АЛКАЛОИД 24-21 (12-11)
Сала: СЦ „Јане Сандански“ во Скопје. Гледачи: 1.000. Судии: Михајло Илиевски и Методија Илиевски. Делегат: Ацо Николовски.

РК ВАРДАР 1961: Томовски, Гогов, Јагуриновски 2, Аларов, Георгиевски 2, Карапалевски 1, Јасухира 8, Родригез 3, Лазаревски 1, Гојковиќ, Срдановиќ 1, Николиќ 2, Петриќ 3, Ѓукиќ 1, Мело, Мишевски.
Седмерци: 5/5. Исклучувања: 10 мин.

РК АЛКАЛОИД: Галевски, Трајкоски, Џонов 1, Петров, Маркоски, Младеновиќ, Серафимов 3, Карасманакис 1, Стојковиќ, М. Митев 5, Велковски, Симоноски 2, Бинго 2, Д. Митев 5, Савревски, Димовски 2.
Седмерци: 5/6. Исклучувања: 14 мин.

Градското дерби започна со доста добра игра во одбраната на двете страни и мал број на голови. Во воведните минути од првиот дел, нашиот тим имаше предност од два гола, беше 1-3 и 3-5, но потоа Вардар заигра подобро во одбраната и фати приклучок во натпреварот.

Домашниот тим во еден момент ги казни нашите грешки во нападот, па имаше и 10-8 во вториот дел од првото полувреме. Меѓутоа, на пауза замина со еден гол предност затоа што на семафорот стоеше 12-11. Расположен кај противникот беше и голманот Мартин Томовски со пет интервенции, наспроти две на Благојче Трајкоски.

По десет минути во второто полувреме резултатот беше 15-14 за Вардар 1961, а проблем за нашиот тим беше третото исклучување и црвениот картон за Марко Стојковиќ. Разликата од еден гол стоеше и понатаму (18-17, па 19-18), а во константна предност од еден до два гола беше Вардар, поради две исклучувања кај нашиот тим на влезот во последните десет минути. Клучен гол затоа што бодовите отидоа на контото на ривалот беше оној на Јапонецот Јасихура, за 23-20.

РК АЛКАЛОИД – ГРК ОХРИД 42-31 (22-14).
Сала: „Автокоманда“ во Скопје. Гледачи: 350. Судии: Сашо Кркачев и Ѓоко Колевски. Делегат: Драган Начевски.

РК АЛКАЛОИД: Трајкоски, Галевски, Џонов 3, Петров, Маркоски 1, Младеновиќ, Серафимов 6, Карасманакис, Стојковиќ 7, М. Митев 7, Велковски 2, Симоноски 3, Бинго 3, Д. Митев 6, Савревски 1, Димовски 3.
Седмерци: 3/3. Исклучувања: 10 мин.

ГРК ОХРИД: Ристевски, Ѓорѓески, Ојлески 3, Матцуока 7, Јукиќ 4, Стоилевски 1, Дрогришки, Пелидија 2, Тасески 2, Рудолф, Кукоски, Крстевски, Шешиќ 1, Орјоникидѕе 5, Бојаниќ 2, Цирар 4.
Седмерци: 6/7. Исклучувања: 4 мин.

Дуелот меѓу двата тима почна израмнето. Резултатот беше близу до 8-7, а потоа РК Алкалоид презеде иницијатива на мечот. Избраниците на Лазаров играа без грешки, а нашиот тим имаше и расположени голмани – Благојче Трајкоски фати шест топки, Иван Галевски одбрани седмерец, за прва поосетна предност од 15-9 во средината на првиот дел.

До финишот на полувремето продолжи ефикасната игра, но РК Охрид цело време ја бркаше нашата позитива. На паузата беше 22-14 за РК Алкалоид, а за одбележување беше одличното прво полувреме на Марко Стојковиќ кој имаше 5/5 учинок, како и неколкуте добри асистенции на Мартин Серафимов за головите.

На стартот на вториот дел Трајкоски продолжи да брани во врвна форма и забележа уште две одбрани, а РК Алкалоид дојде до највисоките 23-14. Додека се играше 43. минута, нашата екипа имаше и плус од десет гола (29-19) и останатиот дел од дуелот во Автокоманда беше само формалност.

Ракометната федерација на Македонија (РФМ) ја изврши ждрепката за завршниот Ф4-турнир од Купот на Македонија на кој се пласира и нашиот РК Алкалоид.

Ждрепката на завршниот настан каде ќе се игра за Куп-пехарот посака во полуфиналната фаза РК Алкалоид да вкрсти со РК Вардар 1961.

Втората полуфинална двојка ја сочинуваат РК Еурофарм Пелистер и ГРК Тиквеш. Победниците од двата натпревари патуваат во финалето.

Завршниот Ф4-турнир во Купот на Македонија ќе се игра во периодот од 16 до 19 мај во СЦ „Борис Трајковски“ во Скопје.
РК Алкалоид полуфиналниот меч со РК Вардар 1961 ќе го игра на 16 мај со почеток од 19:30 часот.

РК АЛКАЛОИД – РК ПРОЛЕТ 62 28-23 (15-11)
Сала: „Автокоманда“ во Скопје. Гледачи: 280. Судии: Ѓорѓи Начевски и Славе Николов. Делегат: Камер Металари.

РК АЛКАЛОИД: Трајкоски, Галевски, Петров, Маркоски 1, Младеновиќ 3, Серафимов 2, Карасманакис, Стојковиќ, М. Митев 3, Ѓоргиев 2, Велковски 1, Бинго 4, Кофиловски, Д. Митев 5, Савревски 3, Димовски 4.
Седмерци: 2/2. Исклучувања: 8 мин.

РК ПРОЛЕТ 62: Тотиќ, Крстески, Пецаковски, Василевски 7, Додевски, Димов, Петковски, Андоновски 9, Петковски, Мајнов, Димковски, Стојановски, Младеновски, Михаљевич, Палевски 3, Арсеновски 4.
Седмерци: 2/3. Исклучувања: 0 мин.

Двете екипи беа израмнети на стартот, а мала криза нашиот тим имаше кога му дозволи на РК Пролет да замине на 8-10, плус остана и без Валентин Карасманакис кој поради старт врз противник доби црвен картон. Сепак, работите си дојдоа на свое место за РК Алкалоид кога се влезе во серија и со пет гола во низа, првпат се замина на плус два (13-10). Во овие моменти одлична беше нашата одбрана, но и Савревски кој диригираше во нападот.

На полувреме резултатот гласеше 15-11, а во прв план во нашата екипа беше Мартин Димовски кој постигна три гола, за предност од 18-13. Во 41. минута од дуелот во „Автокоманда“, избраниците на Кирил Лазаров имаа и највисоки шест гола разлика (21-15), солиден беше и Благојче Трајковски со неколку одбрани, па натпреварот беше полесно да се приведе кон финиш во наша полза. Највисоката позитива која РК Алкалоид ја имаше на натпреварот беше осум гола разлика.

За РК Алкалоид ова беше петта победа во плејофот. Во следната, деветта рунда, нашата екипа игра дуел на гости со ГРК Тиквеш.

РК АЛКАЛОИД – РК Е. ПЕЛИСТЕР 25-35 (12-16)
Сала: „Автокоманда“ во Скопје. Гледачи: 1000. Судии: Ѓорѓи Начевски и Славе Николов. Делегат: Марјан Начевски.

РК АЛКАЛОИД: Галевски 1, Трајкоски, Џонов 3, Петров 1, Маркоски, Младеновиќ 2, Серафимов 5, Карасманакис 2, М. Митев 1, Ѓоргиев, Велковски 4, Бинго, Кофиловски, Д. Митев 6, Савревски, Димовски
Седмерци: 6/7 . Исклучувања: 6 мин.

РК Е. ПЕЛИСТЕР: Лесјак, Гедбане, Манасков 3, Цехте 12, Кузманоски, Тајник 3, Борзаш 3, Танкоски, Радивојевиќ 6, Кузмановски 4, Петровиќ, Пе. Атанасијевиќ, Ѓорговски, Васиљев, Пешевски 4, Па. Атанасијевиќ
Седмерци: 3/3. Исклучувања: 14 мин.

РК Алкалоид добро тргна пред домашната публика и му парираше на противникот. Се играше гол за гол во воведните петнаесетина минути, а играта беше брза и ефикасна и на двете страни. Беше изедначено до 7-7, а потоа неколку промашувања на нашиот тим дозволија ривалот од Битола да се одлепи на 7-11 со четири гола во серија.

Таа позитива од четири гола Пелистер ја задржа и до полувремето (12-16), а на стартот на второто полувреме РК Алкалоид делуваше поразиграно, се врати од шокот и се доближи на негатива од два гола (17-19). Сепак, една погодена статива и одбрана на противничкиот голман Лесјак на гостинот му донесоа од 18-20, враќање на плусот од претходно – 18-22.

Во последните петнаесет минути од мечот, ривалот од Битола ја одбрани предноста во „Автокоманда“ и ги освои бодовите и покрај напорите на нашиот тим да се влезе пак во егал во натпреварот. Во следното коло РК Алкалоид го чека нов домашен натпревар, овој пат против РК Пролет 62.