РК Алкалоид ја комплетираше првата сезона, a се комплетираа и тренинзите на ракометните школи за нашите најмлади ракометари. Околу 500 деца на возраст од 6 до 14 години во целата наша држава беа дел од ракометните школи на РК Алкалоид, а нашето очекување е следната сезона бројот да биде уште поголем!

Влатко Котески, тренер кој последната деценија ѝ ја посвети на работата со млади ракометари и кој зад себе има завидно искуство, е последниот кој излезе од салата ова лето. Првата сезона во РК Алкалоид е завршена, задоволството од сработеното е видливо. 
„Здрави и среќни деца се нашата примарна цел“, вели Влатко Котески.
„Ова беше нашата прва сезона, па затоа и сама по себе е посебна. Заокруживме успешна сезона, во која ги исполнивме зацртаните цели, а ги исполнивме, во делови и ги надминавме, и плановите. Ги воведовме најмладите во нов систем, преку кој се дружевме, трениравме и учевме. Ги воведовме во светот на ракометот. Живееја, се забавуваа и другаруваа како тим, како спортско семејство“, вели Котески.

РК Алкалоид како клуб ги има подвлечено работата и пристапот спрема најмладите како една од најважните работи во клубот.

„Многу внимание им посветивме на дисциплината, на правилниот развој, како и на почитта спрема другите, спрема повозрасните и спрема околината. Во клубот сакаме да креираме личности, не само ракометари. Нема поубаво чувство од тоа кога ќе видиш среќни деца, па затоа следната сезона ќе се прошириме. Заинтересираноста постојано се зголемува. Ќе се обидеме во повеќе училишта да отвориме свои секции, да станеме достапни за што повеќе деца“, вели Котески.

Претседателот на РФМ, г. Живко Мукаетов, му го предаде победничкиот трофеј на нашиот капитен. РК Алкалоид е официјално победник на шампионатот и нов член на Суперлигата!
Денеска испишавме клупска историја!

Нашата прва сезона ја завршивме со медал и со шампионски пехар!
Следната сезона сме дел од Суперлигата!

РК Алкалоид во последното првенствено коло на домашен терен славеше убедлива победа над екипата на РК Младост 1977 од Богданци 39 : 19 (17 : 8) и првенството го заврши на првото место. 

Нашиот тим доминираше во текот на целото првенство и со вкупен ефект од 27 победи и еден нерешен меч од вкупно 28 натпревари, или со 17 победи и со еден нерешен меч од вкупно 18 натпревари во плејоф-првенството, шампионатот го заврши со 52 освоени бода, дури 12 бода повеќе од второпласираниот тим на табелата.

Десниот бек Мартин Серафимов со 144 постигнати гола е најдобар стрелец во нашиот тим во првата сезона. Повеќе од 100 погодоци за РК Алкалоид постигнаа и Игор Ѓоргиев (126), Дарио Кофилоски (119), Александар Стојков (114) и Мартин Димовски (105). 

Само уште едно коло го дели РК Алкалоид од шампионскиот пехар и од промоцијата во повисокиот ранг на натпреварување. 

Денеска, во рамките на претпоследното коло од прволигашкиот шампионат, РК Алкалоид го совлада РК Драчево како гостин со 42 : 28 (22 : 12). 

Нашиот тим немаше големи тешкотии во битката за 26-тата првенствена победа. Од почетокот на натпреварот наметнавме ритам што противникот не можеше да го следи, поведовме со 6 : 0, 10 : 3 и веќе на полувреме имавме двоцифрена предност (22 : 12). Во продолжението на натпреварот се играше резултатски поизрамнето, но од моментот кога поведовме со 24 : 14, разликата постојано беше двоцифрена.

Мартин Димовски со седум и Игор Ѓоргиев со шест гола беа нашите најефикасни ракометари на овој меч.

На едно коло до крајот РК Алкалоид е единствениот тим без пораз. Во последното коло на домашен терен ќе играме против екипата на РК Младост 1977.

РК Алкалоид денеска гостуваше во Гостивар и со победа од 46 : 21 (22 : 11) над екипата на РК Јехона стигна до предност што е недостижна до крајот на првенството пред второпласираниот тим.

Нашиот тим немаше проблеми во битката за трите бода кај гостиварскиот состав. Двоцифрена предност обезбедивме уште во првото полувреме, во вториот дел ја удвоивме разликата и средбата ја завршивме со 25 гола разлика.

На три кола до крајот нашиот тим има девет бода предност и подобар меѓусебен ефект во однос на РК Голден Арт, кој е на второто место, со што го обезбедивме првото место во шампионатот, па следната сезона ќе бидеме промовирани во Суперлигата како најдобро пласиран тим од Првата лига.

 
Нашата следна цел е првенството да го завршиме без пораз. Во следното коло во Салата „Автокоманда“, на домашен терен, ќе играме против екипата на РК Работнички.