Категорија: Uncategorized

Вести

РК Алкалоид комплетираше тим за новите предизвици

РК Алкалоид домашната база во „Автокоманда“ ја замени со тренинг камп на Маврово, каде што десет дена ќе се одработуваат подготовки што ќе претставуваат основа врз која ќе се гради посакуваната натпреварувачка форма потребна за битката на четирите фронта која ќе почне со дуелот од македонскиот Супер Куп.
Сезонава на располагање на тренерот Кирил Лазаров ќе бидат и четири нови ракометари кои дојдоа во летниот преоден рок и треба да ја надополнат и балансираат екипата. Тие се веќе во тренажен процес и се вклопуваат со системот на работа на РК Алкалоид. Нивните амбиции се јасни, а очекувањата големи.

КИРИЛ ЛАЗАРОВ:

„Ние од формирањето на клубот голема шанса даваме на македонските играчи, тоа ни е целта, стратегијата и амбицијата – произведување на македонски играчи. Во тој процес мора да сме трпеливи затоа што е тежок. Најтешко е кога треба да создаваш, ама во исто време и да победуваш, затоа што тимот е таков, победнички.
Се наоѓаме пред третата сезона по ред во Суперлигата и мислам дека од сезона во сезона напредуваме во секоја смисол. Нормално е да си одат играчи низ годините, а нови да доаѓаат, тоа е природната селекција. Се надевам дека оваа сезона ќе бидеме поквалитетни со играчкиот кадар во кој имаме четири нови имиња.

Добиваме доста на голманската позиција со Марко Кизиќ кој е стандарден репрезентативец, кој ќе го имаме заедно со Галевски и Трајковски кои исто така се квалитетни. На десната крилна позиција го добиваме искусниот Никола Костески, што ни беше потребно затоа што таму имавме само млади имиња. Михаил Ивановски заслужува да го носи дресот на Алкалоид како млад и потенцијален играч, а со нас тука е и португалскиот новак Франциско Оливеира да Силва. Се работи за поливалентен играч, бек кој со своите карактеристики можеби ни недостасуваше во тимот. Се надевам дека ќе се вклопи брзо и ќе биде дополнителна вредност во нашиот ростер.

Ние ќе одиме чекор по чекор. Знаеме деа конкуренцијата е силна. Нашите конкуренти се засилуваат, македонското првенство станува силно. И тоа ме радува, затоа што потребна ни е таква лига за да расте и нашата екипа. ЕХФ Европскиот Куп ќе биде ново искуство за нас. Минатата година бевме во ЕХФ Европската лига, ја почувствувавме сласта на победата, како и на нерешениот исход. Во борба сме за четири трофеи оваа сезона – Суперкупот, Купот на Македонија, првенството и ЕХФ Купот, но нема да брзаме никаде. Не чекаат многу предизвици оваа сезона и ќе тежнееме да бидеме се подобри“, изјави Лазаров.

НИКОЛА КОСТЕСКИ:

„Убаво е чувството на враќање во Македонија по толку години во странство. Осум години бев надвор од државата. Прекрасно е пак да си назад, особено во ваков проект како Алкалоид. Имаме добар млад тим, јас како поискусен дојдов тука да помогнам колку што можам. Знаеме кои се целите на клубот, одиме напред и ќе се држиме по плановите на тренерот Лазаров. Се надеваме на добар успех оваа година.
Се познаваме со повеќето играчи од репрезентацијата, сите се борат да успеат на теренот. За македонската репрезентација убаво е што ќе играме сите заедно, добро се познаваме и мислам дека оваа екипа ќе има во иднина многу голем напредок. Ќе играме и во ЕХФ Купот, се надевам дека ќе влеземе добро подготвени, а целите се јасни – секогаш одиме на победа“

ФРАНСИСКО ОЛИВЕИРА ДА СИЛВА:

„Многу сум среќен што сум тука во Скопје. Дојдов во клуб кој има доста млади играчи, ама поседува и голем потенцијал, па се надевам дека ќе бидам додадена вредност на екипата на Алкалоид во остварувањето на резултатите и на успесите. Ја имав можноста да го гледам тимот пред да пристигнам тука на неколку натпревари и видов многу потенцијал. Исто така ме радува и што ќе играм во град кој го сака ракометот и го гледа и доживува како кралски спорт. Возбуден сум и едвај чекам да почнеме со натпревари“

МАРКО КИЗИЌ:

„За мене Алкалоид е нов клуб и нов предизвик, во кој влегувам со големи амбиции. Поголем дел од играчите ги познавам уште од деца, заедно сме играле и сме се натпреварувале. Периодот за адаптација поради тоа ќе ми биде побрз. Стартувавме со подготовки, се надевам на квалитетна подготовка која ќе ни донесе резултати и на домашната сцена и во Европа. Ние сме екипа составена претежно од млади играчи, но дефинитивно имаме квалитетен тим да се носиме со секого.
Околу голманското трио, здравата конкуренција секогаш е добра. Јас ја гледам како позитивна работа, затоа што така може да се притискаме сите еден со друг да бидеме подобри од меч во меч и квалитетно да ја покриеме позицијата оваа сезона“

МИХАИЛ ИВАНОВСКИ:

„Претходната сезона за мене не беше лесна затоа што имав повреда, но втората полусезона ја искористив максимално. Оваа сезона се надевам дека ќе помогнам на Алкалоид во остварувањето на резултатите и да постигнеме поголем успех од лани. Желба ми е да се одбрани Куп-трофејот и ако влеземе во шанса, да играме за највисок дострел на домашната сцена. Ќе играме и во ЕХФ Куп, а таму очекувам да отидеме далеку и секој меч да бидеме се подобри и подобри“

Вести

РК АЛКАЛОИД ГИ ПОЧНА ПОДГОТОВКИТЕ ЗА НОВАТА СЕЗОНА

РК Алкалоид ги почна подготовките за својата трета суперлигашка сезона во која влегува како бранител на пехарот од Куп на Македонија и учесник во меѓународниот ЕХФ Куп.
Екипата својот прв собир го имаше во салата „Автокоманда“, а во Скопје ќе се подготвува до трети август.
Потоа заминува на десетдневни подготовки на Маврово, а својот прв контролен натпревар ќе го игра на 17 август против екипата на Врање.

РК Алкалоид од 20 до 24 август ќе учествува на турнир во Охрид каде што ќе одигра четири натпревари. Првиот на 20 август (16:30 часот) против екипата на Динамо Панчево. Вториот меч ќе го игра на 22 август (21:00 часот) со Олимпијакос Атина, третиот на 23 август (16:30 часот) со екипата на Ловќен од Црна Гора. Последниот ден на турнирот ќе се играат натпреварите за пласман. Не е исклучена можноста да биде договорена уште некоја контролна средба.

Вести

ЧЕТИРИ НОВИ РАКОМЕТАРИ ВО РК АЛКАЛОИД

РК Алкалоид ги почна подготовките за својата трета суперлигашка сезона во која ќе биде и македонски претставник во ЕХФ Куп натпреварувањето на европската сцена.

Неколку играчки промени има во тимот во пресрет на новата сезона. Четири нови ракометари ќе има во екипата во ростерот за престојната сезона.

Никола Костески, искусен македонски репрезентативец ќе ја засили позицијата десно крило. Костески има 31 година и во Македонија се враќа по седум години меѓународна кариера во која настапуваше за екипите на Селка Ескишехир од Турција, Татран Прешов од Словачка, Линц и Холабрун од Австрија и последно, Талент Плзењ од Чешка.

Наш нов играч е репрезентативниот голман на Македонија, Марко Кизиќ. Тој има 23 години, неспорен квалитет солидно искуство и годинава ќе биде додадена вредност во нашата одбрана.

По забележителни настапи и остварениот играчки напредок во екипата на РК Мулти Есенс минатата сезона, во тимот на РК Алкалоид доаѓа десниот бек Михаил Иваноски.
Четвртото засилување е ракометар кој игра на позициите среден и лев бек.

Франциско Оливеира да Силва, 25 годишен португалски играч ќе ја комплетира бековската позиција. Тој е ракометар кој потекнува од ракометниот клуб Брага каде што играше од 2011 до 2020 година. Потоа настапуваше за екипите на Виториа, во 2022 играше за шпанската екипа Гвадалахара, а во 2023 во унгарскиот тим Егер од каде што доаѓа во РК Алкалоид.

Вести

Литвански противник за РК Алкалоид во ЕХФ Куп

Во својата втора европска сезона РК Алкалоид ќе ја претставува Македонија во европскиот ЕХФ Куп, натпреварување што се игра по систем на елиминации, а стартува со 84 екипи кои денеска беа поделени во две кола и ги добија противниците за своите први елиминациски битки.

РК Алкалоид како најдобро рангирана македонска екипа од Македонија во ова натпреварување, почнува од второто коло, а во денешната ждрепка беше во улога на носител.
Првиот противник на РК Алкалоид во новата европска сезона ќе биде екипата на Драгунас Клаипеда од Литванија.
Драгунас (Змејови) е вториот најуспешен литвански клуб од осамостојувањето. Овој клуб во 2010 година ја прекина доминацијата на Гранитас Каунас кој освои 17 шампионски титули за 19 години. Шампионската ера на Драгунас траеше сѐ до првенството 2020 година кое беше прекинато поради Ковид. За тој период од 10 сезони, освоија девет шампионски титули.
Во 2021 на сцената се појави екипата на Швиеса и таа е литвански првак во последните три сезони. Во последната одиграна, пак, во финалето со 3-1 беа подобри токму од Драгунас.
Во клупската историја, Драгунас има освоено шампионски пехар и од Балтичката лига (2021). Во моментов тројца ракометари на Драгунас се на скратениот список на репрезентативци на Литванија. Четири позиции им се пополнети со странски ракометари. Голман, пивот и два леви бека, сите од Украина.

Натпреварите од второто коло во ЕХФ Куп ќе се играат во периодот од 19/20 октомври и 26/27 октомври возвратните натпревари. РК Алкалоид на првиот меч ќе биде домаќин во Скопје.

Вести

РК Алкалоид е победник на турнирот „Марко Божиновски“

Екипата на РК Алкалоид е победник на третото издание на меморијалниот турнир „Марко Божиновски“ што се одржа во Скопје.
Турнирот се игра во конкуренција на кадети, а годинава учесници беа осум екипи од кои три од странство. Нашиот тим беше во конкуренција со екипите на РК Бутел Скопје (34-25), РК Струга (29-22) и РК Морнар од Црна Гора (25-23).


По трите победи, РК Алкалоид се пласираше во финалето каде што се сретна со екипата на Коњух од БиХ која беше најдобра во конкуренцијата на Е. Пелистер, Вардар и романскиот Одорхеи.
Во финалето го контролиравме резултатот целиот натпревар, но противникот постојано беше блиски, а во последните 20 секунди беше актуелен резултат 27-27.
Постигнавме гол, потоа се одбранивме и со конечни 28-27 станавме победници.
Ова е втор пехар на РК Алкалоид на турнирот, го освоивме и второто издание на турнирот, одржано минатата година.

Вести

Минов, Лазаров и Ѓорѓиев: „По успешната сезона, продолжуваме по зацртаниот пат“

Ракометарите, стручните тимови и раководството на РК Алкалоид го одбележаа крајот на овогодинешната сезона, трета во историјата на клубот во која се сретнаа и успешно се носеа со многу нови предизвици меѓу кои е и дебитантскиот настап во Европската лига на ЕХФ, големите дерби мечеви во суперлигашкиот плејоф, историскиот настап и прв пехар во Куп на Македонија, шампионските пехари во пионерска, кадетска и младинска конкуренција и сето тоа проткаено со успешниот настап и големата одговорност што ја носат нашите ракометари со сениорската репрезентација, но и во помладите репрезентации.

Прес конференција и коктел дружење беше организирано по повод крајот на сезоната во присуство на нашите ракометари. Пред медиумите зборуваа претседателот на клубот Горан Минов, тренерот Кирил Лазаров и капитенот Игор Ѓорѓиев.

Кратка ретроспектива на сезоната со акцент на остварените резултати даде претседателот на клубот Горан Минов.

„Завршивме сезона која беше посебна за нас за многу работи, затоа што имавме многу нови предизвици. Се соочивме со нови моменти, како настап во Европа, кој настрана спортскиот и резултатскиот дел, бараше од нас и друг пристап којшто е организациски. Нашата сениорска екипа успешно се претстави во Европската лига на ЕХФ каде игравме со реномирани противници и ги освоивме првите бодови. Успешно и на високо ниво одигравме три европски средби и го положивме тој организациски дел со голема оценка, што за нас беше голем испит. На домашната сцена изборивме место во Европа, а посебна сатисфакција е освоениот Куп на Македонија. Посебно не радуваат успесите на младинските категории, во кои станавме прваци во пионерска, кадетска и младинска категорија. Со макотрпна, но стратегиски успешна работа, изградивме систем во кој сите се вклопија. Успеавме на ракометарите да им вградиме победнички менталитет, тоа ни донесе и успех. Нашата мисија е да дадеме идни македонски репрезентативци кои ќе ја радуваат Македонија во спортот број еден за нас. Сакам да изразам особена благодарност до Алкалоид АД Скопје и Живко Мукаетов, кој како главен покровител ни ги овозможи овие врвни услови за работа. Исто така, голема благодарност до стручниот штаб на чело со Кирил Лазаров како и ракометарите кои максимално се вложија оваа сезона да биде за нас најдобрата и најуспешна до сега. Благодарност до колегите, медиумите и навивачите кои ни беа голема поддршка“, изјави Горан Минов.

Тренерот на екипата Кирил Лазаров зборуваше за предизвиците низ кои минуваше екипата сезонава и ја најави следната сезона во која клубот ќе се стреми за чекор напред и во домашниот шампионат и на eвропската сцена.

„Клубот е формиран пред три години, но ние го одбравме потешкиот, но знам дека е вистинскиот пат, иако се соочуваме со многу препреки. Го одбравме македонскиот пат, работиме добро и за клубот, за државата, за македонскиот спорт и македонскиот ракомет. Се надевам дека и во иднина ќе продолжиме по тој пат иако воопшто нема да биде лесно, затоа што македонската лига од година во година расте. Оваа сезона имавме доминантно претставување во првиот дел, завршивме со 14 победи на 14 меча, а потоа успеавме да освоивме и титула во Купот во кој во неполни 72 часа, чесно и посветено, ги победивме двата најконкурентни тимови. Тоа е голем успех за нас и голема сатисфакција за во иднина дека треба да продолжиме по тој пат и да веруваме, но истовремено да знаеме дека патот ќе биде уште потежок. Завршивме на третото место во плејофот, излеговме во Европа, за нас Европскиот куп на ЕХФ, е вистинскиот и се надевам дека таму ќе бидеме повеќе конкурентни и ќе минеме повеќе кола. Но, морам да истакнам дека посебно ми е драго што успеавме да направиме успеси во младинските категории. во иднина апелирам до раководството на клубот уште повеќе да се вложува во овие категории затоа што тоа е иднината на македонскиот ракомет. Апел до другите клубови да не гледаат конкуренти во нас, туку да инвестираат во млади играчи, затоа што само така може ракометот да го задржи приматот спорт број еден во Македонија.“ , изјави Кирил Лазаров.

Капитенот Игор Ѓорѓиев изјави дека е горд што крај себе има соиграчи-професионалци и на сите им честита за успехот во сезоната на која се спушта завесата.

„Завршуваме една успешна сезона на РК Алкалоид. Нашиот тим сезонава го донесе првиот трофеј во витрините на клубот, тоа е Купот на Македонија, успех на кој посебно сме горди. Игравме и во Европската лига на ЕХФ каде имавме шест квалитетни натпревари со кои стекнавме големо искуство и за нас како млада екипа ќе ни служи многу за наредниот период. Следната сезона повторно ќе играме во Европа, јас како капитен можам да кажам дека сме задоволни од покажаното и нашето издание. Наша главна цел е да играме добар, пред се европски ракомет и со тоа да ја радуваме нашата Македонија. Благодарност до условите кои ни ги овозможи Алкалоид, благодарност до соиграчите кои беа големи професионалци и големи работници. На крајот најмногу сакам да се заблагодарам на нашата публика која неуморно не бодреше цела сезона, со таква поддршка ветуваме борба, залагање и многу поголеми успеси“, изјави Игор Ѓорѓиев.

По обраќањето на присутните, РК Алкалоид им додели подароци и се поздрави со двајца ракометари. Левото крило Дарио Кофилоски и голманот Виктор Василевски си заминуваат од нашиот колектив. Клубот им се заблагодарува за досегашниот придонес, лојалност и посветеност и им посакува успех во натамошната кариера.

РК Алкалоид предвидено е да ги почне подготовките за новата сезона на 25 јули.