РК Алкалоид е формиран во 2021 година со примарна цел младите ракометни таленти кои имаат потенцијал и желба за напредок правилно да се насочат и да се развиваат во врвни играчи со позитивни животни вредности. Правилната работа, дефинираниот систем на функционирање, како и интегритетот и кредибилитетот во работењето се основните начела за кои се залага овој клуб.
Со организација на стручната работа РК Алкалоид и неговиот тим од ракометни експерти ќе се стремат да им овозможат на ракометарите квалитетен и напреден тренажен процес, со цел нивно натамошно развивање и градење како врвни ракометари, кои ќе бидат столб на македонскиот ракомет.
Визијата на клубот е да се стреми кон европските ракометни стандарди на професионална работа, промоција на модерен ракомет и на издигнување на играта на највисоко ниво. Нашата држава е расадник на ракометни таленти. Имаме многу млади кои сакаат да тренираат и кои имаат квалитет, а нашата мисија е со специфични тренинзи и методи на работа тие млади надежи кои ќе ги регрутираме да прераснат во квалитетни ракометни играчи.
РК Алкалоид, по успешниот настап во дебитантската сезона во Првата лига, обезбеди експресен пласман во Суперлигата во сезоната 2022/2023. Главен тренер на тимот во првата сезона во Суперлигата стана македонската ракометна легенда Кирил Лазаров. Во 2022 г. е формиран и РК Мулти Есенс, екипа составена од помлади талентирани играчи кои формираат база на играчи што имаат младински репрезентативен потенцијал. РК Мулти Есенс имаше успешна сезона и како првопласирана екипа обезбеди учество во најсилната конкуренција, во Суперлигата, во сезоната 2023/2024.
Професионалното селектирање на тимот и системската работа во РК Алкалоид донесоа резултат уште во првата сезона во македонската ракометна Суперлига. Нашиот тим секогаш се стреми да биде меѓу најдобрите, и тоа со давање предност на домашните ракометари, а тоа ни успеа затоа што како дебитанти го зазедовме второто, вицешампионското место и со самото тоа обезбедивме место во Европската лига на ЕХФ. Европските натпревари ќе бидат голем плус за нашиот тим, но и за македонскиот ракомет.
Нашите клубови имаат и јасно утврден систем во младинските категории со голем број пријавени млади ракометари. Тие се поделени во шест екипи што играат во три возрасни категории. Во системот на натпреварување се пријавени РК Алкалоид У14 (пионери), РК Мулти Есенс У14 (пионери), РК Алкалоид У16 (кадети), РК Мулти Есенс У16 (кадети), РК Алкалоид У18 (младинци) РК Мулти Есенс У18 (младинци).