БЈЕРИНГБРО СИЛКЕБОРГ – РК АЛКАЛОИД 35-31 (17-16)
Јуск Арена во Силкеборг. Судии: Јап Кломпер и Коен Стубе од Холандија. Делегат: Кристијан Халдорсон
БЈЕРИНГБРО СИЛКЕБОРГ: Ловквист (17 одб 1 сед) Халбек 6, Илсо, Болдсен 6, Орис 6, Лауге, Лингард 1, Фриден 4, Тофт Хансен, Богојевиќ 4, Балинг 4, Вибе, Бјеринг, Солстад 4, Кнудсен, Санд
Седмерци: 2/2 Исклучувања: 6 мин.
РК АЛКАЛОИД: Трајкоски (5 одб), Галевски (4 одб), Џонов 4, Маркоски 1, Серафимов 4, Стојчевиќ, Стојковиќ 3, М. Митев 9, Ѓоргиев 2, Велковски 2, Омерагиќ, Бинго 4, Кофилоски, Д. Митев, Савревски 2
Седмерци: 3/4 Исклучувања: 6 мин.

РК Алкалоид го одигра и својот четврти натпревар во EHF Европската лига. Вечерва како гостин во Силкеборг, нашиот тим одигра меч во кој рамноправно се надигруваше со данскиот состав, на нивни терен, но имаше и еден лош период на почетокот на вториот дел по кој натпреварот доби тек каков што му одговараше на противникот кој на крајот и ги освои бодовите со резултат 35-31.

Домашниот состав на крилјата на голманот кој имаше 10 успешни интервенции во воведните 15 минути, ја казни серијата на промашувања на нашиот тим на почетокот на натпреварот и поведе со 7-3.

Но, се вративме во игра со трпелива игра во одбраната и постојано притискање со транзиција кон нивата дефанзивна линија.
Намали на 8-9 нашиот состав, потоа успеа да стигне и до израмнување од 13-13, 15-15, 16-16, а на одмор се замина со резултат 17-16 за домаќините.

Почетокот на второто полувреме беше фатален за нашиот состав и му даде поинаков тек на натпреварот. Слаба реализација комбинирана со технички грешки во првите осум минути во кои не постигнавме погодок, а примивме пет го одведоа Силкеборг до водство од шест гола разлика (22-16).

Потоа следеше долгиот период на враќање во игра.
Покажа карактер нашиот тим, не се помири со негативата и постојано притискаше. Стигнавме на негатива од три гола разлика со шанса средбата да стана подраматична, но домашните успеаја играјќи „7 на 6“ во еден период да го запрат нивниот пад во нападот и да се одржат во игра додека да истече времето.

РК МУЛТИ ЕСЕНС – РК ПРОЛЕТ 62 31-32 (17-16)
Сала: „Автокоманда“ во Скопје. Судии: Димитар Митревски и Благојче Тодоровски. Контролор: Игор Огненов
РК МУЛТИ ЕСЕНС: Ерманоски, Димевски 6, Костовски, Илиески 5, Д. Узунчев 3, Петрески, Трајчев, Трајковски, Василевски, Т. Узунчев, Димовски 7, Јорданов 6, Карасманакис 3
Седмерци: 2/2 Исклучувања: 8 мин.
РК ПРОЛЕТ 62: Петковски, Јовановски, Крстески, Пецаковски, Василевски 3, Кочаров, Димов, Андоноски 5, Мајнов 6, Димковски 1, Стојановски 1, Јачев, Михаљевиќ, Палевски 5, Арсеновски 8
Седмерци: 4/5 Исклучувања: 6 мин.

РК Пролет беше посреќниот тим вечерва во Автокоманда и успеа со звукот на сирената да ги освои трите бода од дуелот со РК Мулти Есенс.
Гостинскиот состав важеше за фаворит, но нашиот млад тим одигра одличен натпревар и не само што не беше во подредена улога, туку во финишот на мечот имаше и водство и реална шанса да освои не само бод, туку комплетните три.

Гостите водеа во првиот дел, имаа стартни 5-2, но РК Мулти Есенс израмни на 8-8 потоа го презема водството и на полувреме имаше гол предност (17-16).
Во вториот дел гостите одново имаа гол до два предност, но постојано беше блиску и притискаше нашиот тим.

Конечно, по резултат 25-25, во водство премина РК Мулти Есенс. Имавме водство од 27-26, 29-28, а потоа во финишот РК Мулти Есенс напаѓаше за израмнување.
По последните 10 секунди, со гол од цепелин РК Мулти Есенс израмни на 31-31, но напаѓаше без голман поради исклучен играч.
Замената не се изврши доволно брзо за голманот да стигне во својот простор и РК Пролет со шут од центарот на игралиштето на празна мрежа успеа да погоди и победи.

Сезоната во EHF Европската лига влегува во втората половина од групната фаза. По три одиграни натпревари, РК Алкалоид има освоено еден бод, а натпреварувањето ќе го продолжи веќе во вторник, со нов натпревар со данскиот претставник Бјерингбро – Силкеборг.

Дуелот со првиот фаворит во групата ќе биде нова шанса за нашиот тим да ја почувствува жештината на гостинскиот терен во Европа и да ги одмери уште еднаш силите со скандинавски состав. Дуелите со екипите што играат ваков тип на ракомет се драгоцено искуство што се надеваме ќе ја подобри и нашата игра и ќе донесе бенефит во следните натпревари.

„Бјерингбро – Силкеборг покажа дека е фаворит број еден во нашата група и во моментов е најквалитетен тим. Ние ќе одиме во Данска да се надигруваме. Тој меч треба да ни послужи за собирање на ново искуство што треба да го искористиме за тоа што нѐ очекува во иднина. Се надевам дека ќе имаме подобра реализација и во реваншот ќе покажеме поголема борбеност и поголема мотивираност“, изјави тренерот на РК Алкалоид, Кирил Лазаров.

Голманот Благојче Трајковски и оваа сезона игра важна улога и ја дава потребната сигурност на одбраната. Неговото искуство е важно за младите ракометари во составот, а средбата со данскиот претставник и тој ја гледа како можност екипата да порасне.

„На првиот натпревар со Бјерингбро – Силкеборг имавме многу добри моменти, ама исто така и имавме и многу лоши во текот на натпреварот. Промашените пенали и зицери во Европа не чинат пораз еве веќе втор натпревар. На дуелот со Силкеборг ја почувствуваме силата на данскиот ракомет, а за нашите млади играчи е од непроценливо значење тоа искуство. Деновиве ни останува да продолжиме да ги анализираме Данците, да ги увидиме нашите грешки и да ги поправиме за на дуелот во Данска да го дадеме максимумот“, изјави голманот Благојче Трајкоски.

Натпреварот во вторник ќе се игра во Јуск Арената во Силкеборг. Почетокот на мечот е закажан за 20:45 часот, а директен ТВ пренос ќе има на МТВ 3.

РК АЛКАЛОИД – РК АЕРОДРОМ 42-28 (19-18)
Сала: „Автокоманда“ во Скопје. Судии: Исмаил Металари и Ненад Николовски. Делегат: Владимир Саздовски
РК АЛКАЛОИД: Галевски 3, Трајкоски, Џонов 2, Младеновиќ 4, Серафимов 4, Стојчевиќ, Стојковиќ 2, Ѓоргиев 1, Омерагиќ 1, Бинго, Кофилоски 9, Петковски 4, Д. Митев 3, Савревски 9
Седмерци: 4/5 Исклучувања: 4 мин.
РК АЕРОДРОМ: Богдановски, Пајкоски 3, Бучуковски 1, Мелоски 6, Митревски 4, Костов 3, Марковиќ, Павличковски, Олтовски 2, Стојановски 2, Трифуноски 2, Трајчевски, Василев, Анакиевски 3, Анѓелковски 2, Грујевски
Седмерци: 2/5 Исклучувања: 2 мин.

РК Алкалоид меѓу двата европски натпревари со данскиот Бјерингбро – Силкеборг го одигра и својот натпревар од 11 коло во македонската Суперлига.
Гостин во салата Автокоманда беше екипата на РК Аеродром, а средбата заврши со победа на нашиот тим од 42-28.

Во првиот дел се играше резултатски израмнето, при што РК Алкалоид ја контролираше ситуацијата на теренот и имаше водство кое се движеше меѓу гол и два гола разлика.
На полувреме резултатот беше 19-18, а во вториот дел РК Алкалоид посериозно си ја сфати задачата и од резултат 21-20 со серија од 7-0 стигна до водство од 28-20 и потоа до крајот рутински ја одработи средбата.

Тренерот Кирил Лазаров штедеше дел ракометарите, а најдобри стрелци вечерва беа Давид Савревски и Дарио Кофилоски. Двајцата постигнаа по девет гола.
Голманот Иван Галевски и овој пат беше одличен на голот, а успеа да постигне и три погодоци.

РК АЛКАЛОИД – БЈEРИНГБРО СИЛКЕБОРГ 23-31 (12-16)
Сала: „Јане Сандански“ во Скопје. Судии: Давор Лончар и Зоран Лончар од Хрватска. Делегат: Јан Рудински од Словачка
РК АЛКАЛОИД: Ромеро, Трајкоски, Џонов 7, Маркоски, Младеновиќ 2, Серафимов 5, Стојчевиќ, Стојковиќ 3, Ѓоргиев 2, Велковски 2, Омерагиќ 1, Бинго 1, Кофилоски, Петковски, Д. Митев, Савревски
Седмерци: 3/8 Исклучувања: 4 мин.
БЈЕРИНГБРО – СИЛКЕБОРГ: Ловквист, Халбек 9, Илсо, Болдсен 4, Орис, Лауге 2, Лингард 2, Фриден, Богојевиќ, Тофт Хансен, П. Кристенсен 7, М. Кристенсен, Бјеринг 2, Солстад, Санд 2
Седмерци: 1/2 Исклучувања: 10 мин.

РК Алкалоид не успеа во третото коло да стигне до бодови од дуелот со првиот фаворит во групата, данскиот Бјерингбро-Силкеборг. Гостите побрзо се прилагодија и подобро се снајдоа на натпреварот и успеаја да ги однесат бодовите.

Поискусниот гостински состав ја оправда улогата на фаворити, но и РК Алкалоид пружи квалитетен отпор и се бореше во текот на целиот меч. Имаше шанси низ натпреварот да направи и подобар резултат, но неискористените можности, промашените шутеви, посебно ударите од седум метри на крајот беа пресудни.

РК Алкалоид добро го отвори натпреварот и по нецели три минути водеше со 3-0. Но, данскиот клуб покажа дека се работи за квалитетен состав. Брзо се адаптираа на играта и по осум минути израмнија на 4-4.

Во продолжението, гостите ја одржуваа разликата, но РК Алкалоид имаше неколку убави можности да му даде поинаков тек на натпреварот. За жал, нашиот млад тим иако успеваше да организира ситуации за гол, пропушти неколку шанси, не реализираше и удари од седум метри и Данците ја преземаа резултатската контрола.
Разликата во корист на гостинскиот состав се зголеми во финишот на полувремето и на одмор се замина со резултат 12-16.
Во вториот дел се играше во истиот ритам, со тоа што гостите имаа голема поддршка и од голманот кој одбрани важни шутеви и тоа придонесе да се одлепат на шест до седум гола разлика.
РК Алкалоид во последните десет минути имаше неколку можности да се врати во игра и да намали на минус три гола од каде што можеше и поинаку да се развива натпреварот.
Но, повторно не ги искористи своите шанси, противникот тоа го казни и на крајот славеше победа од 31-23.

​РК Алкалоид е пред својот трет меѓународен натпревар, втор на домашен терен во својата дебитантска сезона во EHF Европската лига.
За прв пат нашиот тим за противник ќе има екипа од скандинавскиот полуостров, ќе играме против Бјерингбро – Силкеборг, претставник на актуелниот трикратен светски шампион, Данска.
Тоа е состав што својот висок углед го има заработено со долгогодишни квалитетни настапи и во домашниот шампионат и ширум терените низ Европа. Бил дом на многу ракометни ѕвезди во минатото, а не е исклучок и актуелнава сезона во која по звучност од нивните редови се издвојуваат Расмус Лауге, Рене Тофт Хансен, Јохан Сјостранд…

РК Алкалоид денеска организираше средба со македонските медиуми на која говореа тренерот на екипата Кирил Лазаров и ракометарот Иван Џонов.

„Самото име на противникот и државата од која доаѓа доволно говори за неговиот квалитет. Ќе играме против данска екипа која со години наназад преку својата лига обезбедува излез во Европа. Инвестициите што ги направија летово со ангажманот на Расмус Лауге од Веспрем, еден од најдобрите дански ракометни минативе години заедно со Микел Хансен, кажуваат дека утре ќе имаме сериозен ривал.
Ние треба да бидеме на високо ниво за да можеме да парираме. Се движиме во вистински правец, првиот натпревар го одиграме малку во грч, што беше очекувано. На вториот меч во Шпанија одигравме поквалитетно. Се надевам дека тој раст ќе продолжи и на утрешниот трет меч. Тоа е меч во кој треба да се опуштиме и без притисок да одиграме најдобро што знаеме.
Нашата публика ќе има можност да види квалитетен натпревар меѓу две екипи кои играат модерен ракомет. Очекувам тврд, силен натпревар, а фаворитската улога им ја препуштаме на гостите. Тоа е реалноста, тие самите најавија дека се фаворити. Но, ние ќе гледаме да се поставиме добро и ако ни се укаже шанса да го искористиме моментот и да стигнеме до позитивен резултат“, изјави Кирил Лазаров.

Иван Џонов, ракометар кој сезонава е во подем, од свој агол го најави следниот меч:
„Силкеборг е екипа составена од млади играчи, надополнета со неколку ѕвезди во тимот како Расмус Лауге и Рене Тофт Хансен. Тие се типична скандинавска екипа која игра брз ракомет со добра транзиција. Ние мораме да бидеме дисциплинирани во нападот, да ги лимитираме грешките и со тоа да ја неутрализираме нивната транзиција.
Добро сме тактички подготвени, ако го испочитуваме договореното и одиграме најдобро што знаеме, верувам дека можеме да стигнеме до позитивен резултат. Ќе ни биде потребна и поддршка од нашите верни навивачи и би сакал да ги поканам во што поголем број да дојдат утре и да го проследат овој квалитетен натпревар“, вели Џонов.

Натпреварот почнува во 18:45 часот, а ќе се игра во Спортскиот центар „Јане Сандански“. Билети може да набавите на следниот линк: https://mktickets.mk/event/alkasilk/
Програмата за натпреварот можете да ја видите на следниов линк:

Програма на натпреварот РК Алкалоид – Бјерингбро Силкеборг