Вести

Квалитетната работа, пожртвуваноста и професионализмот вметнат во секојдневната работа од најмлади категории денеска беа наградени на теренот.
Нашата кадетска екипа, РК Мулти Есенс е нов првак на Македонија. Во финалето на Фајналфор турнирот што се одржа во „Автокоманда“, нашиот тим ја совлада екипата на РК Струга со 31-29 и го подигна победничкиот пехар. Претходно во полуфиналето, нашите кадети го совладаа и тимот на ЗРК Голден Арт со 33-24.

Фајналфор турнирот беше круна на настапите на овој наш кадетски состав. Во првенството, РК Мулти Есенс забележа победа на сите 18 одиграни натпревари, а потоа во 1/4 финалето го елиминираше и тимот на ГРК Охрид.
Вкупниот скор од 21 победа на 21 одигран натпревар сезонава е сатисфакција и потврда дека одиме по вистинскиот пат.
Нашите ракометари доминираа и во изборот на најдобрата постава на Ф4 турнирот. Голманот Стефан Јорданов, централниот бек Давид Јаневски и пикерот Јаков Трајковски беа одбрани во најдобрата постава, а Христијан Гурмешевиќ беше прогласен за најкорисен играч.